भारतको नक्साबारे छलफल गर्न राज्य व्यवस्था समितिले प्रधानमन्त्रीलाई बोलायो
<p>काठमाडौं। भारतद्वारा सार्वजनिक नयाँ नक्साबारे संसदको राज्य व्यवस्था तथा सुशासन समितिले प्रधानमन्त्री केपी शर्मा ओलीलाई छलफलको लागि बोलाएको छ।</p>
<p>२५ कात्तिकमा ११:३० बजे राज्य व्यवस्था तथा सुशासन सिमितिको सभाकक्ष, सिंहदरबारमा प्रधानमन्त्रीसहित छलफल गर्ने कार्यक्रम रहेको समितिका सदस्य राजेन्द्रप्रसाद श्रेष्‍ठले <em>देखापढी</em>लाई बताए।</p>
<p>"भारतले निकालेको नक्सा सच्याउन नेपाल सरकारले गरिरहेको पहलबारे प्रधानमन्त्रीबाट जानकारी लिनेछाैं," श्रेष्ठले भने।</p>
<p>भारत सरकारले केही दिनअघि सार्वजनिक गरेको राजनीतिक नक्सामा नेपाली भूभाग कालापानी, लिपुलेक र लिम्पियाधुरा समावेश गरेपछि देशैभर विरोध प्रदर्शन भइरहेको छ। </p>
<p>भारतसँगको सीमा समस्या र नेपाली भूभाग अतिक्रमणबारे साझा राष्ट्रिय धारणा तय गर्न प्रधानमन्त्रीले २३ कात्तिक साँझ सर्वपक्षीय बैठक आह्वान गरेका थिए।</p>
<p>बैठकमा पूर्वप्रधानमन्त्रीहरू, पूर्वपरराष्ट्रमन्त्रीहरू, सत्तारुढ तथा प्रतिपक्षी दलका नेताहरू तथा सीमाविज्ञहरूको सहभागिता थियो। </p>
<p>बैठकमा कालापानी, लिपुलेक र लिम्पियाधुरा नेपाली भूभाग रहेको साझा धारणा बनाउँदै कूटनीतिक पहलबाट समाधान खोज्‍नुपर्नेमा सबै एकमत भएका छन्। </p>
<p><br />
</p>
प्रतिक्रिया दिनुहोस्
.jpg)
