खोलाले बगाएर दुई जना बेपत्ता
<p>बेनी। म्याग्दीको अन्‍नपूर्ण गाउँपालिका-५ र ६ को सिमानामा पर्ने घारखोलाले बगाएर एक महिला बिहीबार साँझदेखि बेपत्ता भएकी छिन्। अन्नपूर्ण-५ पाउद्धारकी अन्दाजी ५५/५६ वर्षकी टीकामति परियार बेपत्ता भएको प्रहरी नायब उपरीक्षक किरनजङ्ग कुँवरले जानकारी दिए।</p>
<p>उनका अनुसार घारबाट पाउद्धारतर्फ जानका लागि खोला तर्ने क्रममा बेपत्ता भएकी परियारको खोजी जारी छ। घार प्रहरी चौकीबाट खटिएका प्रहरीसहित स्थानीयवासीले खोजी गरेका थिए। शुक्रबार बिहानैदेखि बेपत्ताको खोजीकार्यलाई निरन्तरता दिएको प्रहरी नायब उपरीक्षक कुँवरले बताए।</p>
<p><strong>सेतीमा बगेर १३ वर्षीय बालक बेपत्ता</strong></p>
<p>डोटी। पौडी खेल्ने क्रममा सेती नदीमा बगेर एक बालक बेपत्ता भएका छन्। बेपत्ता हुनेमा डोटीको आदर्श गाउँपालिका-६ गिरीचौका खतेडा गाउँका मानबहादुर खडायतका १३ वर्षीय छोरा अर्जुन खडायत रहेका जिल्ला प्रहरी कार्यालय डोटीका प्रहरी प्रमुख जनकराज पाण्डेले जानकारी दिए।</p>
<p>पौडी खेल्ने क्रममा गाउँ नजिकैको सेती नदीमा बगेर उनी बेपत्ता भएका र खोजीकार्य भइरहेको प्रहरीले जनाएको छ। जिल्लामा एक महिनाको अवधिमै सेती नदीमा बगेर पाँच जनाको ज्यान गइसकेको छ। वर्षात्को समयमा सेती नदीमा पानीको बहाब बढ्ने भएको सावधानी नअपनाउने गरेका कारण नदीमा पौडी खेल्न जानेहरु बगेर बेपत्ता हुन थालेको स्थानीयवासी बताउँछन्।</p>
<p>रासस</p>
प्रतिक्रिया दिनुहोस्
.jpg)
