बेरुत विस्फोटमा मृत्यु हुनेको संख्या १३५ पुग्यो
<p>काठमाडाैं। लेबनानको राजधानी बेरुतको प्रमुख बन्दरगाहमा मंगलबार भएको शक्तिशाली विस्फोटमा परी ज्यान गुमाउनेको संख्या १३५ पुगेको छ।</p>
<p>करिब २ हजार ७५० टन ‘एमोनियम नाइट्रेट’ नामक रासायनिक पदार्थ भण्डारण गरेको एक गोदाम घरमा भएको यस विस्फोटमा परी चार हजार भन्दा बढी घाइते भएका बताइएको छ।</p>
<p>यस गोदाममा सन् २०१४ मा एक कार्गो जहाजबाट बरामद गरिएको ‘एमोनियम नाइट्रेट' भण्डारण गरिएको थियो।</p>
<p>लेबनानका गृहमन्त्री मोहम्मद फाहमीले सो गोदाममा एमोनियम नाइट्रेट राखिएकाले त्यो विस्फोट शक्तिशाली हुन पुगेको र यसले ठूलो क्षति पुर्याएको बताएका थिए।</p>
<p>लेबनानका प्रधानमन्त्री हासान डीयाबले यस विस्फोटलाई देशको ठूलो विपत्तिको रूपमा व्याख्या गरेका थिए। उनले यस विषयको अनुसन्धान शुरु भइसकेको र दोषीहरूलाई जबाफदेही बनाइने बताए छन्।</p>
<p>उनले एक टेलिभिजनमा सम्बोधन गर्दै "यस घटनामा संलग्नहरुलाई कडा कारबाही गरिने छ र उनीहरूलाई उम्किन नदिइने" बताएका छन्।</p>
<p>गोदाममा राखिएको एमोनियम नाइट्रेटको अवस्था बारेमा जाँचबुझ गरी पाँच महिना अघि नै लेबनान सरकारलाई प्रतिबेदन बुझाइएको पनि संचार माध्यमहरुले जनाएका छन्।</p>
<p>प्रतिबेदनमा एमोनियम नाइट्रेटको भण्डारमा सुरक्षा सतर्कता अति जरुरी रहेको औंल्याइएको थियो।</p>
<p>रासस/सिन्ह्वा</p>
प्रतिक्रिया दिनुहोस्
.jpg)
