विस्फोटनपछि बेरुतबाट तीन लाख मानिस विस्थापित
<p>काठमाडाैं। लेबनानको राजधानी बेरुतमा भएको विनाशकारी विस्फोटनपछि झण्डै तीन लाख मानिस विस्थापित भएका छन्। </p>
<p>शक्तिशाली विस्फोटनका कारण उनीहरू घरबारविहीन भएकाले उनीहरु विस्थापित हुनु परेको अधिकारीहरुले बुधबार जनाएका छन्।</p>
<p>स्थानीय गभर्नर ममार्वान अब्बौडले विस्थापित हुनेहरुको विवरण सङ्कलनकै क्रममा रहेको र अझै धेरै विस्थापित भएको हुनसक्ने बताए।</p>
<p>लेबनानको राजधानी बेरुतको प्रमुख बन्दरगाहमा मङ्गलबार विनाशकारी र शक्तिशाली विष्फोट भएको थियो। विस्फोटनमा परी एक सयभन्दा बढीको मृत्यु भएको छ भने चार हजारभन्दा बढी घाइते भएका छन्।</p>
<p>करिब दुई हजार ७५० टन ‘अमोनियम नाइट्रेट’ नामक रासायनिक पदार्थ भण्डारण गरेको एक गोदाम घरमा भएको यस विस्फोटनको आवाज धेरै ढाटासम्म सुनिएको स्थानीय बासिन्दाले बताएका छन्।</p>
<p>यस गोदाममा सन् २०१४ मा एक कार्गो जहाजबाट बरामद गरिएको ‘अमोनियम नाइट्रेट’ भण्डारण गरिएको थियो </p>
<p>लेबनानका प्रधानमन्त्री हासान डीयाबले यस विष्फोटलाई देशको ठूलो विपत्तिको रुपमा लिइएको बताएका छन्। उनले एक टेलिभिजनमा सम्बोधन गर्दै यस घटनामा संलग्नलाई कडा कारबाही गरिने प्रतिबद्धता पनि जनाएका छन्। </p>
<p>यस विस्फोटनको घटनाप्रति विश्वभरबाट सहानुभूति र समवेदना व्यक्त भइरहेको छ। कतिपय देश तथा अन्तर्राष्ट्रिय निकायले लेबनानलाई सहयोगको घोषणा पनि गरेका छन्।</p>
प्रतिक्रिया दिनुहोस्
.jpg)
