नवनियुक्त एआइजीद्वयलाई गृहमन्त्रीको निर्देशन- ‘टिम वर्क’ मा विशेष ध्यान दिनुहोस्
<p>काठमाडौं। गृहमन्त्री रामबहादुर थापा ‘बादल’ ले नवनियुक्त प्रहरी अतिरिक्त महानिरीक्षक (एआईजी)हरू निरजबहादुर शाही र प्रधुम्नकुमार कार्कीलाई ‘टिम वर्क’ मा विशेष ध्यान दिन निर्देशन दिएका छन्।</p>
<p>कार्यकक्षमै बिहीबार दिउँसो बोलाएर मन्त्री थापाले प्रहरी संगठनमा ‘टिम वर्क’ को आवश्यकता हुने भन्दै त्यसतर्फ ध्यान दिन एआइजीद्वयलाई निर्देशन दिएका हुन्।</p>
<p>"राष्ट्रले विश्वास गरेर तपाईंहरूलाई यो जिम्मेवारी दिइएको छ, आफूले पाएको जिम्मेवारी इमानदारीपूर्वक, दृढतापूर्वक र सृजनात्मक ढंगले निर्वाह गर्नुहोला”, मन्त्री थापाले भने, “शान्ति, सुरक्षा, अमनचयन कायम गर्न तपाईंहरूको भूमिका महत्वपूर्ण हुने विश्वास लिएको छु।”</p>
<p>उनले संघीय संरचनाअनुसार प्रहरी समायोजन चाँडै हुने बताए। त्यसका लागि सातै प्रदेशको आन्तरिक मामिलामन्त्रीहरूसँगै बैठक बसेर समायोजनको विषयमा मोटामोटी सबै विषय टुङ्गो लागेको पनि बताएका छन्। </p>
<p>गत सोमबार बसेको मन्त्रिपरिषद बैठकले शाही र कार्कीलाई एआइजीमा नियुक्त गरेको थियो।</p>
प्रतिक्रिया दिनुहोस्
.jpg)
