कार्टुनमा पोको पारेर फालिएकाे अवस्थामा भेटिइन् पाँचदिने बालिका
<p>काठमाडौं। कपनस्थित आकाशेधाराका चौरमा बालबालिका खेलिरहेका थिए। नजिकैको चौरमा एउटा कार्टुन देखे।</p>
<p>कार्टुनमा के रहेछ भनेर हेर्न जाँदा भर्खर निद्राबाट ब्युँझेर हाई गरिरहेको बच्चा देखे। कपडामा बेरर राखिएको ४-५ दिनकी शिशु ती बालिका देखेपछि झनै खुसी भइन्।</p>
<p>ती बालिका नजिकै आएका बालिकालाई हेर्न थालिन्।</p>
<p>‘केयर बाल गृह’ का बालबालिकाले ती शिशुलाई आफ्नो घर लैजाने भने। सार्वजनिक भएको भिडिओमा पनि उनीहरूले बाल गृहकी सञ्‍चालिका पुष्पा अधिकारीलाई खबर गरेको सुनिन्छ। </p>
<p>उनीहरूको ती बालिकाको तस्वीर र भिडिओ खिच्छन्। एक बालिकाले “हाम्रो घर लगम् न दिदी प्लिज। कस्तो क्यूट छ हामीलाई मन पर्‍यो। हाम्रो बहिनी बनाउने नि प्लिज” भनेको भिडिओमा सुनिन्छ।</p>
<p>उनीहरूको ‘मामू’ पुष्पा आउँदासम्म शिशुको नाम जुराईसकेका थिए। क्यूट बेबीको नाम नै ‘प्राप्तिका’ राखिसकेका थिए। उनीहरूले फेला पारेको भएर उनको नामनै ‘प्राप्तिका अधिकारी’ राखेका थिए।</p>
<p>पुष्पाले उद्धार गर्दै शिशुलाई आफ्नो गृहमा राखेकी छन्। खेल्न गएका बालिकाहरूले देखेर आफुलाई खबर गरेपछि उद्धार गरेर ल्याइएको पुष्पाको भनाई छ।</p>
<p>“गृहका बालबालिका सधै बेलुका खेल्न जान्छन्। हिजो साँझ ६ बजेतिर खेल्ने क्रममा कार्टुनभित्र बच्चा देखेपछि मलाई खबर गरेका थिए,” पुष्पाले भनिन्, “मैले प्रहरीलाई समेत खबर गरेको थिए। तर, पहिलादेखि नै बालबालिकाको संरक्षण गरिरहेकोले प्रहरीले पनि मलाई नै लैजान भन्‍नुभयो।”</p>
<p>उनको गृहमा अहिले १५ बालबालिका छन्। बेवारिसे अवस्थामा फेला परेका तथा सहाराविहीन बालबालिकालाई संरक्षण गर्दै आएकी उनले ती बालिकालाई गृहमै संरक्षण दिने बताइन्। </p>
<p>अहिले ती बालिकालाई ल्याक्टोजिन खुवाइरहेका छन्। कसले र किन फाल्यो भन्‍ने अहिलेसम्म पत्ता लाग्‍न नसकेको उनको भनाइ छ। बालिका आफ्नो भएको दाबी गर्दै अहिलेसम्म कोही पनि नआएको पुष्पा बताउँछिन्।</p>
प्रतिक्रिया दिनुहोस्
.jpg)
