कीर्ते र ठगी मुद्दाका फरार व्यक्ति पक्राउ
<p>काठमाडाैं। सरकारी छाप कीर्ते र ठगी मुद्दामा दोषी ठहर भई फरार हुँदै आएका एक व्यक्तिलाई प्रहरीको केन्द्रीय अनुसन्धान ब्यूरो (सिआइबी) को टोलीले पक्राउ गरेको छ।</p>
<p>उच्च अदालत पाटनको २०७० चैत १७ गतेको फैसलाले दोषी ठहर भई फरार हुँदै आएका ललितपुरको महाङ्‍काल बस्ने ४३ वर्षीय हरिशरण महतलाई बुधबार साँझ पक्राउ गरी आज फैसला कार्यान्वयनका लागि काठमाडौं जिल्ला अदालतमा पेश गरिएको सिआइबीका प्रमुख प्रहरी नायव महानिरीक्षक सहकुलबहादुर थापाले जानकारी दिए।</p>
<p>उक्त मुद्दामा उच्च अदालतको फैसलाले दुई वर्ष कैद तथा ३७ लाख ५० हजार रुपैयाँ जरिवाना हुने ठहर गरेको थियो। उनी ललितपुरको सातदोबाटोबाट पक्राउ परेको आज सिआइबीले विज्ञप्तिमार्फत जनाएको छ। महतसमेतका व्यक्तिहरुले लोप्साङ लामा र निजकी श्रीमती च्यूङ्ताङ लामाको नाममा रहेको काठमाडौं सीतापाईलास्थित कित्ता नम्बर ८१८ को जग्गा मालपोत कार्यालय कलङ्‍कीका खरिदार भीमबहादुर राईसमेतको मिलोमतोमा सरकारी छाप कीर्ते गरी बिक्री गरेका थिए।</p>
<p>उनीहरुले काठमाडौं जिल्ला अदालतबाट जारी भएको अधिकृत वारेसनामालगायत अन्य कागजात नक्कली बनाई उक्त जग्गा सिन्धुपाल्चोकका कमलकुमार श्रेष्ठको नाममा नामसारी गराई कास्कीका प्रवीणमान श्रेष्ठलाई गफलतमा पारी ७५ लाख रुपैयाँमा बिक्री गरेको जनाइएको छ। </p>
<p>सोही कसुरमा संलग्न मालपोत कार्यालय कलङ्‍कीका भीमबहादुर राईलाई २०७४ सालमा नै पक्राउ गरेको थियो। <em>रासस</em></p>
प्रतिक्रिया दिनुहोस्
.jpg)
