संखुवासभाको सिलिचोङमा पहिरोले ८ घर बगायो, ११ बेपत्ता, ३ जना घाइते
<p>काठमाडौं। संखुवासभाको सिलिचोङ गाउँपालिका-१ बेसिन्दामा पहिरोले ८ घर बगाउँदा ११ जना बेपत्ता भएका छन्। </p>
<p>पहिरोमा परेका तीनजनाको भने सकुशल उद्धार गरिएको छ। </p>
<p>उनीहरूमध्ये ७५ वर्षीय एक वृद्ध गम्भीर घाइते छन्। उनलाई उपचारका लागि काठमाडौं पठाउन हेलिकप्टरको व्यवस्थाका लागि गृह मन्त्रालयलाई आग्रह गरिएको संखुवासभाका सहायक प्रमुख जिल्ला अधिकारी मोहनमणि घिमिरेले जानकारी दिए।</p>
<p>“पहिरो गएको ठाउँमा सडक यातायात छैन। पैदल नै पुग्नुपर्छ,” उनले भने, “सदरमुकामदेखि त्यहाँ पुग्नै करीब डेढ दिन लाग्छ।”</p>
<p>उनका अनुसार अविरल वर्षापछि राति २ बजेको समयमा माथीबाट खसेको पहिरोले घर बगाएको हो। पहिरो गएको खबर पाए लगत्तै बिहानै त्यसतर्फ सुरक्षाकर्मीको टोली परिचालन भइसकेको छ। </p>
<p>“पहिरो गएको नजिकै रहेको प्रहरी चौकीबाट पनि त्यहाँ पुग्न करीब ६ घण्टा लाग्छ,” उनले भने, “पछिल्लो समय फोन सम्पर्क हुन नसकेकाले विवरण आइपुगेको छैन।” </p>
<p>सदरमुकामदेखि नेपाली सेना, सशस्त्र प्रहरी र नेपाल प्रहरीको थप मद्दत टोली त्यसतर्फ खटिसकेको सहायक प्रमुख जिल्ला अधिकारी घिमिरेले जानकारी दिए।</p>
प्रतिक्रिया दिनुहोस्
.jpg)
