यी नदी तथा खोलाको वरपर हुन सक्छ बाढीको खतरा
<p>काठमाडौं। देशका केही प्रदेशमा भारी वर्षा भएसँगै त्यहाँका नदी तथा खोलामा अचानक पानीको सतह बढ्दा वरपर रहेका वासिन्दालाई बाढीको खतरा हुने राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। </p>
<p>प्राधिकरणका अनुसार प्रदेश १ को झापा, मोरङ, सुनसरी, उदयपुर, संखुवासभा, खोटाङ, ओखलढुंगालगायत सबै जिल्लामा बहने नदी तथा खोलामा आकस्मिक बाढीको उच्च सम्भावना छ। प्रदेश २ को सबै जिल्लामा पनि यो खतरा छ।</p>
<p>बागमती प्रदेशको दोलखा, रामेछाप, सिन्धुली, सिन्धुपाल्चोक, काभ्रेपलाञ्चोक, मकवानपुर, चितवन, धादिङ, नुवाकोट, काठमाडौं उपत्यकामा रहेका नदी तथा खोलाहरूमा पनि भारी वर्षाका कारण जुनसुकै बेला ठूलो बाढी आउन सक्ने प्राधिकरणले जनाएको छ।</p>
<p>गण्डकी प्रदेशको नवलपरासी, लमजुङ, तनहुँ, स्याङ्जा, पवर्वत, कास्की, म्याग्दी, बाग्लुङ र आसपासका जिल्लामामा रहेका नदी तथा खोला वरपर पनि बाढीको खतरा छ। </p>
<p>प्रदेश ५ को तराईको जिल्लामा बहने स-साना खोला तथा नदीमा पनि आकस्मिक आउने बाढीको खतरा रहेको जनाइएको छ।</p>
<p>“आज कोशी र नारायणीमा बहाव उल्लेख्य बढ्ने र सतर्कता आसपास हुने तथा नारायणी र यसका केही सहायक नदीमा खतरा आसपाससम्म पुग्न सक्ने छ,” प्राधिकरणद्वारा आज जारी विज्ञप्तिमा उल्लेख छ।</p>
<p>कन्काई, कमला, बागमतीलगायतमा पनि बहाव बढ्ने र केही सहायक नदीमा पनि आकस्मिक बहाव बढ्न गई खतरा तह आसपास पुग्ने जनाइएको छ।</p>
प्रतिक्रिया दिनुहोस्
.jpg)
