विश्वमै धेरै भीड हुने फ्रान्सको लुवर संग्रहालय पुनः खुल्ला
<p>काठमाडाैं। विश्वकै अत्यधिक धेरै मानिस जाने मानिने फ्रान्सको लुवर संग्रहालय झण्डै साढे तीन महिनापछि पुनः खुलेको छ। </p>
<p>कोरोनाभाइरसको सङ्क्रमणको खतरा बढ्दै गएपछि बन्द गरिएको संग्रहालय सोमबारदेखि सर्वसाधारणका लागि पुनः खुल्ला गरिएको हो। </p>
<p>पुनः खुल्ला गरिएपछिको पहिलो दिनमा सोमबार झण्डै सात हजार मानिसले संग्रहालय भ्रमण गरेको जनाइएको छ।</p>
<p>जबकि कोरोनाभाइरसको सङ्क्रमण फैलिनु अघिसम्म दैनिक ३० हजार मानिसले संग्रहालयको भ्रमण गर्ने गरेका थिए।</p>
<p>संग्रहालयमा आउनेहरूलाई मास्क लगाउन अनिवार्य गरिएको संग्रहालयका अध्यक्ष तथा निर्देशक जेन लुक मार्टिनेजले जानकारी दिए। </p>
<p>हरेक चरणमा ५०० आगन्तुकहरूलाई व्यवस्थापन गर्ने गरिएको उनले बताए। त्यसका लागि उनीहरूलाई आधारभूत स्वास्थ्य सतर्कता र मापदण्डहरू पूरा गर्नैपर्ने व्यवस्था पनि गरिएको उनको भनाइ छ।</p>
<p>आगन्तुकहरूलाई बस्ने ठाउँमा सामाजिक दूरी कायम हुने गरी व्यवस्था गरिएको र एकातिरबाट जाने र अर्कोतिरबाट निस्कने व्यवस्था गरिएको छ।</p>
<p>एउटै बाटोमा फर्केर हिँड्न नपाइने नियम लगाइएको मार्टिनेजले बताए। </p>
<p>चर्चित यस संग्रहालय गत मार्च महिनाको १३ तारिखदेखि बन्द थियो। बन्दका कारण दशौँ लाख टिकट बिक्रीबाट हुने आम्दानी गुमेको र धेरै टिकटहरू फिर्ता गर्नु परेको पनि उनले जानकारी दिए। </p>
<p>संग्रहालयमा युरोपेली देशबाहेक चीन, दक्षिण कोरिया, जापान, अमेरिका, ब्राजिललगायतका देशबाट आउने आगन्तुकहरू नदेखिएको पनि उनले बताए। <em>रासस-सिन्ह्वा</em></p>
प्रतिक्रिया दिनुहोस्
.jpg)
