क्वारेन्टिनमा बस्नेले गरे गाउँपालिकालाई आर्थिक सहयोग
<p>स्याङ्जा। फेदीखोला गाउँपालिकाले निर्माण गरेको क्वारेन्टिनमा बस्दै आएकाहरूले बिदा भएर आ-आफ्नो घर जाने बेलामा आर्थिक सहयोग गरेका छन्।</p>
<p>क्वारेन्टिनमा बस्ने १८ जनाले गाउँपालिकाले क्वारेन्टिनमा राम्रो व्यवस्थापन गरेकामा प्रसन्न भई ३२ हजार २० रूपैयाँ सहयोग गरेर आज बिदा भएका छन्।</p>
<p>उनीहरूले जनही एक हजारदेखि पाँच हजार रूपैयाँसम्म सहयोग गरेको जनाइएको छ।</p>
<p>भारतबाट आएर सिद्धार्थ बहुमुखी क्याम्पसको क्वारेन्टिनमा बस्दै आएका युवाले गाउँपालिकाले आफूहरुलाई क्वारेन्टिनमा बस्दा उपलब्ध गराएको सेवासुविधाले प्रभावित भएर कोरोना संक्रमणको रोकथाम र नियन्त्रमा सहयोग पुगोस् भनी क्वारेन्टिनमा बस्नेहरूबाट स्वेच्छिकरूपमा आर्थिक सहयोग गरेको बताएका छन्। </p>
<p>गाउँपालिका अध्यक्ष घनश्याम सुवेदीले क्वारेन्टिनमा बस्नेहरु गाउँपालिकाले दिएको सेवासुविधामा सन्तुष्ट भएर घर गएकामा आफूलाई खुशी लागेको बताए।</p>
<p>यसैबीच गाउँपालिकाले निर्माण गरेको क्वारेन्टिनमा बस्दै आएका आठजनाको पीसीआर परीक्षणको रिपोर्ट नेगेटिभ आएपछि आज उनीहरूघर फर्किएका छन्।</p>
<p>अब क्वारेन्टिनमा २१ जना बाँकी छन्। <em>रासस</em></p>
प्रतिक्रिया दिनुहोस्
.jpg)
