चितवन मेडिकल कलेजमा ३० शय्याकाे कोभिड-१९ आईसीयू
<p>काठमाडाैं। चितवन मेडिकल कलेजले ३० शय्याको कोभिड-१९ सघन उपचार कक्ष स्थापना गरेको छ।</p>
<p>कोरोना संक्रमण भएकाहरूको उपचारका लागि अस्पतालले सघन उपचार कक्ष स्थापना गरेको हो।</p>
<p>सो कक्षको आज रोटरी इन्टरनेशनल वर्ष २०२१/२२ का प्रेसिडेन्ट शेखर मेहता, डिष्ट्रिक्ट ३२९२ का गभर्नर किरणलाल श्रेष्ठ र प्रमुख जिल्ला अधिकारी नारायणप्रसाद भट्टराईले उद्घाटन गरेका थिए। </p>
<p>मेहताले सामाजिक सञ्जालमार्फत् सम्बोधन गरेर र श्रेष्ठ एवं भट्टराई प्रत्यक्ष उपस्थित भएर उद्घाटन गरेका हुन्। </p>
<p>कलेजका अध्यक्ष एवं प्रबन्ध निर्देशक प्राडा हरिशचन्द्र न्यौपानेले ३० शय्या भेन्टिलेटरसहितको सुविधासम्पन्न सघन उपचार कक्ष हुने बताए। </p>
<p>भेन्टिलेटरमा रोटरी फाउन्डेशनले सहयोग गरेको हो। न्यौपानेका अनुसार यो सघन उपचार कक्ष कोभिड-१९ उपचारका लागि नेपालकै सबैभन्दा ठूलो र सुविधासम्पन्न हुनेछ।</p>
<p>हाल चारवटा भेन्टिलेटर भए पनि १५ दिनभित्र ३० वटै भेन्टिलेटर आइपुग्नेछ। </p>
<p>स्वास्थ्य मन्त्रालयमा कोभिड-१९ उपचारका लागि अनुमति माग गरिएको भन्दै उनले पीसीआर प्रयोगशालासमेत तयारी अवस्थामा रहेको बताए। <em>रासस</em></p>
प्रतिक्रिया दिनुहोस्
.jpg)
