फुटसल खुलाउन माग गर्दै व्यवसायीले बुझाए ज्ञापनपत्र
<p>काठमाडौं। नेपाल फुटसल व्यवसायी संघले सुरक्षित रूपमा फुटसल खुलाउन माग गर्दै जिल्ला प्रशासन कार्यालय काठमाडौंमा ज्ञापनपत्र बुझाएकाे छ।<br />
<br />
लकडाउन खुकुलो भए पनि फुटसल सञ्‍चालनका लागि राज्यले कुनै पहल नगरेकोप्रति संघको गम्भीर ध्यानाकर्षण भएको जनाएको छ। संघले लामो समय फुटसल व्यवसाय बन्द हुँदा व्यवसायी गम्भीर आर्थिक समस्या परेकाे उल्लेख गर्दै सञ्‍चालनको प्रबन्ध गरिदिन माग गरेकाे छ।</p>
<p>“विश्वव्यापी रूपमा लकडाउन केही खुकुलो भएसँगै खेल क्षेत्रमा पनि सावधानी अपनाएर खेल सञ्‍चालन कार्यविधि निर्माण गरी सञ्‍चालन गर्न हामी व्यावसायीहरू पूर्ण प्रतिबद्ध छौं,” संघले बुझाएको ज्ञापनपत्रमा भनिएको छ, “फुटसल खुलाउनेतर्फ राज्यको कुनै पहल नभएको हुँदा हाम्रो गम्भीर ध्यानाकर्षण भएको छ।”</p>
<p>नेपालमा ४ चैतबाट खेलकुद गतिविधि सञ्‍चालन गर्न प्रतिबन्ध लगाइएको थियो। कोभिड-१९ महामारीका कारण ११ चैतबाट लकडाउन घोषणा गरेपछि खेलकुद गतिविधि बन्द भएको थियो।<br />
<br />
“यस अवस्थामा खेल सञ्‍चालन गर्दा खेल मैदान परिसरभित्र प्रवेश गर्नुअघि खेलाडीको तामक्रम जाँच्ने, साबुन पानीको व्यवस्था, सेनिटाइजर र व्यवस्थित बाथरूमका साथै कुनै भीडभाड नहुने प्रतियोगिता नगर्ने, कर्मचारीको स्वास्थ्यको विशेष ध्यान दिने तथा फुटसल मैदानभित्र १० जनामात्र प्रवेश दिने प्रतिबद्धता व्यक्त गर्दछौं,” संघले भनेको छ।</p>
प्रतिक्रिया दिनुहोस्
.jpg)
