कोरोनाको अप्रमाणित औषधि बेच्दै पतञ्जली
<p>काठमाडौं। भारतीय योग गुरु रामदेवले आफ्नो कम्पनी पतञ्जलीले कोरोनाको औषधि पत्ता लगाएको भन्दै गरेको दाबीलाई त्यहाँको स्वास्थ्य मन्त्रालयले आफूलाई कुनै जानकारी नभएको बताएको छ। </p>
<p>रामदेवले हरिद्वारमा पत्रकार सम्मेलन गरेर पतञ्जलीले कोभिड-१९ को उपचार शुरू गरेको बताएका थिए। ‘पतञ्जलीको दाबी र विवरणबारे कुनै जानकारी छैन,’ मन्त्रालयले भनेको छ, ‘कोरोनाको उपचारसम्बन्धी कुनै पनि दाबी र शोध गर्नुपूर्व मन्त्रालयलाई जानकारी गराउनु अनिवार्य छ।’</p>
<p>उत्तराखण्ड सरकारले भने उक्त औषधि बिक्रीवितरणको तयारीलाई समर्थन गर्ने सङ्केत दिएको छ। तर, औषधिको अनुमति लिनका लागि दिइएको आवेदनमा स्पष्ट रूपमा कोभिड रोग किटान गरिएको छैन।<br />
<br />
बिनाअनुसन्धान औषधि बेचबिखन गर्नु नीतिनियमको ठाडो उल्लंघन भएकाले भारतको ड्रग रेगुलेटर, सेन्ट्रल ड्रग्स स्ट्यान्डर्ड कन्ट्रोल अर्गनाइजेसनले त्यसमा रोक लगाउनुपर्ने माग हुन थालेको छ। </p>
<p>महामारी अनियन्त्रित हुँदै गएको समयमा यसरी विश्वसनीय अनुसन्धानबिना नै औषधि बजारमा आउँदा पनि नियामक निकाय मौन रहनुलाई ‘अपारदर्शी र सुस्त’ बताइएको छ। </p>
<p>कतिपयले भने अप्ठेरो समयमा पतञ्जलीको प्रयासको सराहना गर्नुपर्ने बताइरहेका छन्। विशेषज्ञहरु भने यसलाई लिएर चिन्तित छन्।</p>
<p>सरकारले कोभिड-१९ बारे कुनै पनि घोषणा या दाबीलाई गम्भीर रूपमा लिन आग्रह गर्दै आएको छ। अप्रमाणित दाबी तथा बिनासूचना औषधि बिक्रीवितरण गरेको पाइएमा कारबाही हुने भारत सरकारले बताउँदै आएको छ। </p>
<p>तर, पतञ्जलीका रामदेव टेलिभिजन च्यानलहरुमा निर्धक्क औषधि तथा आफ्ना उत्पादनको विज्ञापन गर्दै र अन्तर्वार्ता दिँदै आएका छन् । </p>
<p><em>(स्क्रोलडटइनबाट)</em></p>
प्रतिक्रिया दिनुहोस्
.jpg)
