.jpg)
दुई महीनामा कोरोना संक्रमित ४० हजार पुग्ने अनुमान, भेन्टिलेटर र आईसीयू थप्दै मन्त्रालय
<p>काठमाडौं। स्वास्थ्य तथा जनसंख्या मन्त्रालयले कोभिड-१९ को संक्रमणबाट हुने सम्भावित बिरामीको प्रक्षेपण गरेर उपचारको व्यवस्था गरेको छ। </p>
<p>मन्त्रालयले मुलुकभर एक हजार भेन्टिलेटर र एक हजार ८०० सघन उपचार कक्ष (आईसीयू) तयारी अवस्थामा राखेको छ। मन्त्रालयका नीति तथा योजना प्रमुख डा. गुणराज लोहनीले कोभिड-१९ संक्रमणबाट गम्भीर हुने दुई हजारलाई लक्षित गरेर भेन्टिलेटर र आईसीयू बनाइएको बताए। </p>
<p>‘‘अहिले संक्रमण बढदै गए २ भदौसम्म ४० हजार संक्रमित हुने र तीमध्ये पाँच प्रतिशत बिरामी गम्भीर हुँदा दुई हजार र दुई प्रतिशत भए ८०० बिरामी हुन्छन् भनेर हामीले आँकलन गरेका छौँ’’, उनले भने, ‘‘त्यही अनुसार हामीले भेन्टिलेटर र आईसीयू तयार पारेका छौँ।’’</p>
<p>मन्त्रालयले प्रत्येक प्रदेशमा दुई/दुई वटा अस्पतालका दरले पाँच/पाँच वटा आईसीयू र दुई/दुई वटा भेन्टिलेटर बनाउन निर्देशन दिएको थियो। </p>
<p> यसअघि मन्त्रालयले ८९० भेन्टिलेटर र एक हजार ६०० शय्या बनाएकोमा संक्रमित बढ्दै गएपछि भेन्टिलेटर र आईसीयू शय्या थप गरिएको हो। </p>
<p>इपिडिमियोलोजी तथा सरुवा रोग नियन्त्रण महाशाखाका निर्देशक डा. वासुदेव पाण्डेले ९८ प्रतिशत संक्रमित कोभिड–१९ सँग सम्बन्धित कुनै लक्षण नदेखिएको बताए। उनका अनुसार अहिले काठमाडौंमा तीन, बुटवलमा ६ र पाटन स्वास्थ्य विज्ञान प्रतिष्ठानमा एकजना आईसीयूमा राखेर उपचार भइरहेको छ। </p>
<p>अहिले दैनिक तीनदेखि ४०० को दरले सङ्क्रमित देखा परेका छन् । नेपालमा पहिलोपटक चीनको वुहान शहरबाट आएका व्यक्तिमा गत ९ माघमा कोरोना भाइरस संक्रमण देखिएको थियो। </p>
<p>अहिलेसम्म कूल नौ हजार २६ जनामा कोभिड-१९ पुष्‍टि भएको छ। तीमध्ये एक हजार ७७२ जना डिस्चार्ज भएका छन् भने २३ जनाको मृत्यु भएको छ। <em>रासस</em></p>
प्रतिक्रिया दिनुहोस्
.jpg)
