महिला र बालबालिकाका लागि चितवनमा छुट्टै क्वारेन्टाइन
<p>चितवन। जिल्लामा पहिलो पटक महिला र बालबालिकाका लागि राप्ती नगरपालिकाले छुट्टै क्वारेन्टाइनको व्यवस्था गरेको छ। </p>
<p>राप्ती-६ मा रहेको भण्डारा माविमा महिला तथा बालबालिकाका लागि छुट्टै क्वारेन्टाइनको व्यवस्था गरिएको हो। </p>
<p>महिलामैत्री क्वारेन्टाइनको सुविधा नभएको गुनासो आइरहेको समयमा राप्ती नगरपालिकाले भण्डारा माविमा ५० बेडको महिलामैत्री क्वारेन्टाइन निर्माण गरेको छ। </p>
<p>तत्कालका लागि ३० बेडको क्वारेन्टाइनको व्यवस्था भए पनि ५० शय्या पुर्‍याइने नगरपालिका प्रमुख प्रभा बरालले बताइन्। </p>
<p>बरालका अनुसार महिला तथा बालबालिकाका लागि छुट्टै क्वारेन्टाइन निर्माण गरी सुरक्षाका लागि महिला प्रहरीको व्यवस्थापन गरिनेछ । </p>
<p>तेस्रो मुलुकका नेपाली आउने क्रम जारी रहेकाले उनीहरूको व्यवस्थापनका लागि वडाध्यक्ष जल्लु चौधरीको अध्यक्षतामा समिति गठन गरिएको छ। </p>
<p>यस पालिकाबाट हालसम्म १२१ जना क्वारेन्टाइनको समय अवधि पूरा गरेर घर फर्किएका छन् भने अहिले ५३ जना क्वारेन्टाइनमा रहेका छन्। तीमध्ये १० महिला छन्। <em>रासस</em></p>
प्रतिक्रिया दिनुहोस्
.jpg)
