तनाव, अवसाद, द्वेष, इर्श्या र निन्दाबाट मुक्त हुन योग : प्रधानमन्त्री ओली
<p>काठमाडौं। प्रधानमन्त्री केपी शर्मा ओलीले समाजलाई स्वस्थ, खुशी र सकारात्मक मनोचेतनाले डोर्‍याउन योग मानवीय जीवनको अंग बन्‍नु आवश्यक रहेको बताएका छन्। </p>
<p>अन्तर्राष्‍ट्रिय योग दिवसको अवसरमा शुभकामना सन्देश दिँदै प्रधानमन्त्री ओलीले योगको महत्वका बारेमा चेतना अभिवृद्धि गर्ने र यसका सरल विधिहरूको जनसाधारणमा पहुँच पुर्‍याउने काममा यस दिवसलाई सबै तह र क्षेत्रले सार्थकले बनाउनुपर्ने बताए। ‘‘यतिबेला सिंगो विश्‍वसँगै हामी पनि कोरोना भाइरसको महामारीसँग जुधिरहेका छौं। यस्तो बेला औषधीय गुणयुक्त आहार, व्यायाम र उच्च मनोस्वास्थ्य अन्यन्तै महत्वपूर्ण विषय हुन्," प्रधानमन्त्रीको सन्देशमा भनिएको छ, "यी विषयमा योग शास्त्रले ज्ञान दिँदै आएको छ । आधारभूत स्वास्थ्य सेवाभित्र योग र वानस्पतिक औषधीय वस्तुको प्रयोगमा समेत जोड दिँदै हामी निरोगी नेपालको उद्देश्य पूरा गर्न सक्छौं।’’</p>
<p>संयुक्त राष्‍ट्रसंघले सन् २०१५ देखि २१ जुनलाई अन्तर्राष्‍ट्रिय योग दिवस मनाउन थालेको हो । नेपालमा भने १ माघमा राष्‍ट्रिय योग दिवस मनाइन्छ । ‘‘मानसिक अन्तर्यात्रामार्फत शारीरिक तथा मानसिक स्वास्थ्यको अध्ययन गर्ने योग शास्त्रको महत्व आधुनिक युगमा झनै मुखर भइरहेको छ। तनाव, अवसाद, द्वेष, इर्श्या र निन्दाका दुष्‍प्रभावबाट मुक्त गर्दै समाजलाई स्वास्थ, खुशी र सकारात्मक मनोचेतनाले डोर्‍याउन योग मानवीय जीवनको अंग बन्‍नु आवश्यक छ,’’ प्रधानमन्त्रीको सन्देशमा उल्लेख छ। </p>
<p>प्राच्य दर्शनमा अपनाइएको योग पद्दतिलाई आधुनिक मेडिकल विज्ञानले पनि स्वीकार गरिसकेको प्रधानमन्त्रीले आफ्नो सन्देशमा खुलाएका छन्। ‘‘समृद्ध नेपाल-सुखी नेपाली हाम्रो राष्‍ट्रिय आकांक्षा छ। शारीरिक एवं मानसिक रूपले स्वस्थ र निरोगी नागरिक यसका मुख्य आधार हुन्,’’ सन्देशमा भनिएको छ, ‘‘अन्तर्राष्‍ट्रिय योग दिवसको यस अवसरमा योग साधना र अभ्यासलाई आफ्नो जीवनशैली बनाएर आरोग्य प्राप्त गर्न म सबैमा आह्वान गर्छु।’’</p>
प्रतिक्रिया दिनुहोस्
.jpg)
