आज विश्व संगीत दिवस, राज्यबाट वैकल्पिक व्यवस्था हुनुपर्ने माग
<p>काठमाडौं। आज विश्‍व संगीत दिवस। कोरोना कहरबीच नेपालसहित विश्‍वभर संगीत दिवस मनाइँदैछ। सन् १९८२ देखि हरेक वर्ष २१ जुनमा संगीत दिवस मनाइँदै आएको छ। नेपालमा भने २०५४ सालदेखि दिवस मनाउन थालिएको हो। </p>
<p>फ्रान्समा तत्कालीन संस्कृतिमन्त्री ज्याक लोले यसको शुरुवात गराएका थिए। कोरोना महामारीका कारण यस वर्षको दिवसमा खासै औपचारिक कार्यक्रमहरू आयोजना गरिएको छैन। </p>
<p>संगीत चाहे खुशी हुँदा होस् वा दु:खी, सधैं मानिसको साथमा हुन्छ। एक्लोपन होस् वा साथीभाइ जमघट, संगीत जुनै अवस्था र परिस्थितिमा साथ रहन्छ। संगीतको महत्त्व मानव जीवनमा निकै छ। </p>
<p>गायक हेमन्त शर्मा कोरोना महामारीले संगीतक्षेत्र अस्तव्यस्त बनाएको बताउँछन्। कलाकारको आम्दानीको ८० प्रतिशत हिस्सा भनेको स्टेज कार्यक्रम रहेको उनले बताए।</p>
<p>कोरोना महामारीपछि पनि गीत-संगीत क्षेत्र अहिले जसरी नै अगाडि बढ्ने, तर भाव प्रकट गर्ने शैली फरक हुने शर्माले बताए। "हामीले प्रस्तुत गर्ने कुरा त सबै एकै हो। तर, प्रस्तुत गर्ने शैली मात्र फरक हुन्छ," शर्माले भने। </p>
<p>कोरोना महामारीपछि आफ्ना कलाकार तथा संगीत सर्जकलाई जोगाइराख्‍न राज्यले वैकल्पिक व्यवस्था गर्नुपर्ने उनको भनाइ छ। "भारतमा अहिले कलाकार डिप्रेसनको शिकार भइरहेका छन्। राज्यले सम्बोधन गर्न सकेन भने नेपालमा पनि जटिल अवस्था नआउला भन्‍न सकिँदैन," शर्माले भने।</p>
प्रतिक्रिया दिनुहोस्
.jpg)
