'ट्वान्टी-२० विश्वकप यो वर्ष गर्नु अव्यावहारिक'
<p>काठमाडौं। पाकिस्तान क्रिकेट बोर्डका अध्यक्ष एहसान मणिले अस्ट्रेलियामा हुने आईसीसी पुरुष ट्वान्टी-२० विश्‍वकप यस वर्ष आयोजना गर्न व्यावहारिक नहुने बताएका छन्। उनले प्रतियोगिता एक वर्ष पछाडि सर्न सक्ने सम्भावना रहेको आगामी तीन, चार सातामा त्यसबारे निर्णय हुने बताएका छन्। </p>
<p>आईसीसीमा दोस्रो वरिष्‍ठ सदस्य रहेका मणिले १८ अक्टोबरदेखि १६ नोभेम्बरसम्म अस्ट्रेलियामा हुने भनिएको ट्वान्टी-२० विश्‍वकप आयोजना कोभिड-१९ महामारीका कारण व्यावहारिक नहुने बताउँदै आएका छन्। मंगलबार अस्ट्रेलियन क्रिकेट बोर्डका प्रमुख अर्ल इल्डिङ्सले सहभागी देशमध्ये केहीमा अझै पनि संक्रमण बढ्दो रूपमा भएका कारण प्रतियोगिता आयोजना गर्न व्यावहारिक रूपमा धेरै कठिन हुने बताएका थिए। </p>
<blockquote>
<p>‘‘अस्ट्रेलिया र न्युजिल्यान्ड सरकारले कोभिड-१९ महामारी नियन्त्रणमा धेरै सफलता हासिल गरे पनि प्रतियोगिता आयोजना गर्नु ठूलो चुनौती हुनेछ’’</p>
</blockquote>
<p>‘‘अस्ट्रेलिया र न्युजिल्यान्ड सरकारले कोभिड-१९ महामारी नियन्त्रणमा धेरै सफलता हासिल गरे पनि प्रतियोगिता आयोजना गर्नु ठूलो चुनौती हुनेछ,’’ मणिले हिजो भने, ‘‘पाकिस्तानको टीम इङ्ल्यान्डमा छ। उनीहरू होटलभित्र छन् र भीडभाड छैन। एक-दुई टीमका लागि त्यो ठीक छ। तर ट्वान्टी-२० मा १२ देखि १६ वटा टीम हुन्छन्। त्यसैले त्यो सम्भव छैन। आजसम्ममा आईसीसीका कुनै प्रतियोगिता २०२० मा गर्न सम्भव छ भन्‍ने मलाई लाग्दैन।’’</p>
<p>आईसीसी बोर्डबाहेक मणि र इल्डिङ्स दोस्रो महत्वपूर्ण र प्रभावकारी फाइनान्स एन्ड कमर्सियल अफेयर कमिटीमा पनि छन्। उक्त कमिटीमा मणि अध्यक्ष हुन् भने इल्डिङ्स ६ सदस्यमध्येका एक हुन्। फाइनान्स एन्ड कमर्सियल अफेयर कमिटीले नै विश्‍वभर पुरुष तथा महिला क्रिकट प्रतियोगिताका लागि बजेट विनियोजन गर्ने गर्छ।</p>
प्रतिक्रिया दिनुहोस्
.jpg)
