रेलिगेसनबाट बच्ने मेइन्जको आश
<p>काठमाडौं। जर्मन बुन्डेसलिगामा दोस्रो स्थानको बोरुसिया डर्टमण्डविरुद्ध २-० को नतिजा निकाल्दै मेइन्जले रेलिगेसनबाट बच्‍ने सम्भावना बढाएको छ। </p>
<p>भ्रमणकारी मेइन्जले ३३औं मिनेटमा जोनाथन बुकर्डको गोलबाट अग्रता लिएको थियो। ४९औं मिनेटमा जिन फिलिप माटेयाले पेनाल्टीमा गोल गर्दै टीमको अग्रता दोब्बर बनाएका थिए। </p>
<p>जितसँगै मेइन्ज ३२ खेलबाट ३४ अंक जोडेको छ। जुन १६औं स्थानको डुसेलडर्फभन्दा पाँच अंकले माथि हो। जर्मन बुन्डेसलिगामा अब दुई खेल (६ अंकको) मात्र बाँकी छ। </p>
<p>डर्टमण्डको भने पछिल्लो ११ लिग खेलमा यो दोस्रो हार हो। बुन्डेसलिगामा बायर्न म्युनिखले लगातार आठौं पटक उपाधि पक्का गरेपछि अब दोस्रो स्थानका लागि प्रतिस्पर्धा भइरहेको छ। डर्टमण्ड शीर्ष क्लब बायर्नभन्दा १० अंकले पछि परेको छ। </p>
<p>डर्टमण्ड ६६ अंकका साथ दोस्रो स्थानमा छ। जुन तेस्रो स्थानको आरबी लिपजिग भन्दा तीन अंकले मात्र माथि हो। गएराति नै सम्पन्‍न खेलमा लिपजिगले डुसेलडर्फविरुद्ध २-२ को बराबरी खेलेको थियो। </p>
<p>महामारीका कारण लिग स्थगित भएर पुनः शुरू हुँदा डर्टमण्डले बायर्नलाई उपाधि होडमा कडा टक्कर दिने विश्‍वास गरिएको थियो। युवा जोशले भरिएको डर्टमण्डले पुनः शुरू भएपछिको तेस्रो खेलमा बायर्नलाई १-० को नतिजा सुम्पिएपछि उपाधि आशा सकिएको थियो। </p>
<p>बुधबार राति घरेलु मैदानमा जडोन सान्चो, युलियन ब्रान्ड र इर्लिङ हालान्ड सम्मिलित डर्टमण्डको आक्रामक पंक्ति मेइन्जविरुद्ध फितलो बनेको थियो। </p>
<p>बायर लेभरकुसेनले कोल्नलाई ३-१ ले हराउँदै लिगको चौथो स्थानमा उक्लिएको छ। च्याम्पियन्स लिगको स्थानमा उक्लिएको लेभरकुसेनको ६० अंक छ। जुन पाँचौं स्थानको बोरुसिया मोन्चेनग्लाडबचभन्दा एक अंकले माथि हो। होफेनहेइमले औसबर्गलाई ३-१ ले हराउँदै सातौं स्थानमा उक्लिएको छ।</p>
प्रतिक्रिया दिनुहोस्
.jpg)
