क्वारेन्टाइन र होल्डिङ सेन्टर व्यवस्थित गर्न १७६ स्थानीय तहलाई १६ करोड रुपैयाँ
<p>काठमाडौं। सरकारले एक सय ७६ वटा स्थानीय तहमा क्‍वारेन्टाइन र होल्डिङ सेन्टर स्थापना, व्यवस्थापन र मर्मत सुधार गर्न १६ करोड रुपैयाँ दिने भएको छ। कोभिड-१९ संक्रमण रोकथाम, नियन्त्रण र उपचार कोषमा जम्मा भएको रकम क्‍वारेन्टाइन र होल्डिङ सेन्टर व्यवस्थापनका लागि दिन लागिएको हो।</p>
<p>यसै साता बसेको कोषको बैठकले स्थानीय तहलाई उक्त रकम निकासा दिने निर्णय गरेको हो। संघीय मामिला तथा सामान्य प्रशासन मन्त्रालयले एक सय ७६ वट स्थानीय तहलाई पत्र पठाई क्‍वारेन्टाइन र होल्डिङ सेन्टर व्यवस्थापन गर्न कोषबाट रकम निकासा हुने जानकारी दिएको छ।</p>
<p>क्‍वारेन्टाइनहरूको मर्मत सुधार, निर्धारित मापदण्ड बमोजिम थप व्यवस्थापन, क्‍वारेन्टाइनमा बसेका व्यक्तिको बसोबास, बन्दोबस्ती र खानपिन व्यवस्था र आवश्यकताअनुसार स्वास्थ्य जाँच गर्नेलगायत काममा उक्त रकम खर्च हुने कोषको निर्णयमा उल्लेख छ।</p>
<p>बैठकको निर्णयअनुसार स्थानीय तहहरूलाई क्‍वारेन्टाइन स्थापना, व्यवस्थापन र मर्मत सुधार गर्न १३ करोड २२ लाख ५६ हजार आठ सय २५ रुपैयाँ र होल्डिङ सेन्टर व्यवस्थापना गर्न दुई करोड ७७ लाख २३ हजार रुपैयाँ उपलब्ध गराइने छ।</p>
<p>क्‍वारेन्टाइन र होल्डिङ सेन्टर अव्यवस्थित भएको र त्यहाँ रहेका सर्वसाधारणले निकै दुःख पाएको समाचार बाहिर आएपछि सरकारले कोषबाट आवश्यक व्यवस्थापन गर्न रकम दिने निर्णय गरेको हो।</p>
<p>कोषबाट क्‍वारेन्टाइन र होल्डिङ सेन्टर व्यवस्थित गर्न रकम पाउने स्थानीय तहहरू प्रायः सबै भारतसँग सीमा जोडिएका छन्। पछिल्लो समय भारतबाट ठूलो संख्यामा नेपाली स्वदेश फर्केपछि उनीहरूलाई क्‍वारेन्टाइनमा राख्‍न स्थानीय तहहरूलाई गाह्रो भएको थियो।</p>
प्रतिक्रिया दिनुहोस्
.jpg)
