संक्रमितको घर सिल, परिवारलाई छाक टार्नै मुस्किल
<p>कैलाली। धनगढी उपमहानगरपालिका-१२ जुगेडा ‘ए’ गाउँका ३२ वर्षीय पुरुषमा कोरोना संक्रमण पुष्टि भएपछि उनको घर सिल गरियो। त्यसका कारण उनको परिवारका सदस्यहरूलाई छाक टार्न समस्या भएको छ।</p>
<p>गत २० जेठमा भारतको मुम्बईबाट आएका ३२ वर्षीय पुरुषमा दुई दिनअघि कोरोना संक्रमण पुष्टि भएको थियो। त्यसलगत्तै उनका तीनवटा घर सिल गरिएको छ। एउटा घरमा उनका ६५ वर्षीय बाबु र ५९ वर्षीया आमा बस्छन्। अर्को घरमा उनकी भाउजु, भाइबुहारी र उनीहरूका तीन सन्तान बस्छन्।</p>
<p>घर सिल गरिएपछि परिवारका सदस्य बाहिर निस्किन पाएका छैनन्। न त उनीहरूले दैनिक उपभोग्य सामग्री नै खरिद गर्न पाएका छन्। स्थानीय तह र छिमेकीले पनि उनीहरूलाई सहयोग गरेका छैनन्। कोरोना संक्रमितको घर भन्दै कोही नजिकै आउँदैन।</p>
<p>उनीहरूलाई एक सामाजिक संस्थाले हिजो एक महीनाका लागि खाद्यान्‍न, नुन, तेल, दाल, बिस्कुट र महिलाका लागि हाइजेनिक प्याक प्रदान गरेको थियो।</p>
<p><strong>१२ किलोमिटर हिँडेर कोरोना परीक्षण</strong><br />
कोरोना आशंका गरिएका उनी दुई दिनअघि ६ किलोमिटर पैदल यात्रा गर्दै कोरोना परीक्षणका लागि धनगढी पुगे । परीक्षणपछि हिँडेरै घर फर्के । सुस्त मनिस्थितिका उनलाई सम्हाल्न अगाडि ५९ वर्षीया आमा थिइन् भने पछाडि ६५ वर्षीय बुवा । र, सँगै थिए, प्रहरी ।</p>
<p>बिहान ८ बजे घरबाट हिँडेका उनीहरू परीक्षणपछि दिउँसो २ बजे घर फिर्ता भएका थिए । एम्बुलेन्स वा अन्य सवारी साधनको व्यवस्था नहुँदा उनीसँग उनका वृद्ध बाबुआमाले पनि पैदल १२ किमीको दूरी तय गर्नुपरेको थियो ।</p>
प्रतिक्रिया दिनुहोस्
.jpg)
