आईओएमकी नवनियुक्त डिन प्राध्यापक डा. दिव्या सिंह भन्छिन्- ‘चार वर्षभित्रमा चिकित्सा शिक्षाको सुधार गर्छु’
<p>काठमाडौं। त्रिभुवन विश्‍वविद्यालय चिकित्साशास्त्र अध्ययन संस्थान(आईओएम)को डीनमा नियुक्त भएकी प्राध्यापक डा. दिव्यासिंह शाहले आफ्नो कार्यकाल चिकित्सा शिक्षाको सुधारमा केन्द्रित हुने बताएकी छन्।</p>
<p>डिनमा नियुक्त भएपछि देखापढीसँग प्रतिक्रिया दिँदै उनले आईओएमको सुधार गरेर चिकित्सा शिक्षालाई थप गुणस्तरीय बनाउन आफूले काम गर्ने बताएकी हुन्। “मुख्यगरी मेडिकल शिक्षा, स्वास्थ्य सेवा, रिसर्चका पाटो छन्,” उनले भनिन्, “कसरी पठनपाठनलाई नयाँ तरिकाले अगाडि बढाएर लैजाने, स्वास्थ्य सेवाको थप सुधार र समग्र मेडिकल शिक्षाको गुणस्तर सुधार गर्ने त्यसमै मेरो फोकस हुनेछ।”</p>
<p>कलेजहरूको शिक्षाको गुणस्तर वृद्धि गर्ने र एउटा नियममा लैजाने भन्‍ने पनि आफ्नो योजनामा रहेको र ती सबैको अध्ययन गरेर योजना बनाउँदै अगाडि बढ्ने उनले बताइन्। “हामीकहाँ अहिले पनि रिसर्चको पाटो एकदमै कमजोर छ। त्यसका लागि पनि कसरी व्यवस्थापन गर्ने र राम्रो बनाउन सकिन्छ भन्‍ने योजना बनाउँछु,” उनले भनिन्, “कार्यभार सम्हालेर त्यहाँ सबैसँग सल्लाह गरेर कार्ययोजना बनाएर अघि बढ्छु।”</p>
<p>२४ वर्षदेखि त्रिभुवन शिक्षण अस्पताल महाराजगञ्‍जमा कार्यरत डा. शाहलाई त्रिवि कार्यकारी परिषदले डिनमा नियुक्त गरेको हो। प्राध्यापक डा. प्रेम ज्ञवालीको संयोजकत्वमा गठित सर्च कमिटीले शाहसँगै प्रा. डा. उत्तमकृष्ण श्रेष्ठ र प्रा. डा. प्रदीप वैद्यको नाम सिफारिस गरेको थियो। </p>
<p>प्रधानमन्त्री केपी शर्मा ओलीकी निजी चिकित्सकसमेत रहेकी ५५ वर्षीय डा. सिंह डिन नियुक्त हुने पहिलो महिला हुन्। मिर्गौला रोग विशेषज्ञ उनको नेपालमा मिर्गौला प्रत्यारोपण शुरु गराउन महत्त्वपूर्ण भूमिका छ। त्रिवि शिक्षण अस्पतालको नेफ्रोलोजी विभागकी प्रमुखसमेत रहेकी उनको प्रधानमन्त्री ओलीको नेपालमै दोस्रोपटक मिर्गौला प्रत्यारोपण गराउनमा समेत भूमिका छ। आईओएमका तत्कालीन डिन प्रा. डा. जगदिशप्रसाद अग्रवालले उमेर हदका कारण २१ जेठदेखि अनिवार्य अवकाश पाएपछि शाह नियुक्त भएकी हुन्।</p>
प्रतिक्रिया दिनुहोस्
.jpg)
