चाैरजहारी घटनाका २१ अभियुक्तको सकियो बयान
<p>पश्चिमरूकुम। ६ जनाकाे ज्यान जाने गरी भएकाे चौरजहारी घटनामा अभियोग लागेकाहरूको बयान रुकुम अदालतमा जारी छ।</p>
<p>१ असारदेखि शुरू भएको बयानअन्तर्गत आज थप १० जनाको बयान सकिएको रुकुम अदालतले जनाएको छ।</p>
<p>यससँगै आजसम्म २१ जनाको बयान सकिएको छ।</p>
<p>पक्राउ परेकामध्ये अब आठजनाको मात्र बयान बाँकी रहेको रुकुम अदालतका स्रेष्तेदार कृतबहादुर बोहराले जानकारी दिए।</p>
<p>१ असारमा दुई नाबालक र हिजाे ९ जनाको बयान सकिएको थियो।</p>
<p>उनीहरू सबैको बयान सकिएपछि थुनछेक बहस शुरू हुने स्रेष्तेदार बोहराको भनाइ छ।</p>
<p>“पक्राउ परेका प्रतिवादीहरूको बयान भोलिसम्ममा सकिने देखिएको छ”, उनले भने, “बयान सकिएलगत्तै थुनछेक बहस शुरू हुनेछ, समय भए भोलिबाटै पनि थुनछेक बहस शुरू हुन सक्छ ।”</p>
<p>१० जेठमा ६ जनाको ज्यान जाने गरी भएको घटनामा संलग्न भएको आरोप लगाउँदै जिल्ला सरकारी वकिल कार्यालयले रुकुम अदालतमा ३४ जनाविरुद्ध मुद्दा दर्ता गराएको छ।</p>
<p>तीमध्ये दुई नाबालकसहित २९ जना पक्राउ परिसकेका छन् भने पाँच जना फरार छन्।</p>
<p>३४ मध्ये ३३ जनालाई कर्तव्य ज्यान, ज्यान मार्ने उद्योग, जातीय भेदभाव र छुवाछुतको कसूरमा मुद्दा दर्ता गरिएको छ भने एक जनाविरुद्ध मतियारको मुद्दा लगाइएको छ।</p>
<p>यसैबीच बयान र थुनछेक बहस सकिएका दुई नाबालकलाई भने मुद्दा पुर्पक्षका लागि बाल सुधारगृहमा पठाउन अदालतले आदेश दिइसकेको छ। <em>रासस</em></p>
प्रतिक्रिया दिनुहोस्
.jpg)
