बेइजिङ्मा उच्च सतर्कता, सयौं उडान र रेलसेवा रद्द
<p>बेइजिङ्। चीनको केन्द्रीय राजधानी बेइजिङ्‍मा कोरोना भाइरसविरुद्धको लडाइँलाई फेरि सशक्त बनाउन लागेको छ।</p>
<p>पछिल्लो समयमा अनपेक्षितरूपमा कोरोना संक्रमितहरू भेटिन थालेपछि बेइजिङ्‍मा उच्च सतर्कता अपनाउन थालिएको हो।</p>
<p>उच्च सतर्कता अपनाउने क्रममा बेइजिङ्‍मा रहेका दुईओटा विमानस्थलबाट हुने सयौं आन्तरिक उडान रद्द गरिएको छ।</p>
<p>अधिकारीहरूले दिएको जानकारीअनुसार करीब एक हजार २५५ ओटा आन्तरिक उडान रद्द भएका हुन्।</p>
<p>बेइजिङ्‍मा अहिलेसम्म ९० हजार जनाको कोरोना परीक्षण गरिएको र नयाँ ३१ सहित कूल १३७ जना संक्रमित भेटिएपछि सरकारी अधिकारीहरूले उच्च सतर्कता अपनाउने निर्णय गरेका हुन्। </p>
<p>बेइजिङ्बाट हुने अन्तर्राष्ट्रिय उडान भने यसअघि देखिनै बन्द हुँदै आएको थियो। त्यो अनिश्चितकालका लागि स्थगित गरिएको छ।</p>
<p>त्यसैगरी राष्ट्रिय रेल मार्गबाट पनि बेइजिङ्भन्दा बाहिर जानका लागि बन्द गरिएको छ।</p>
<p>टिकट काटिसकेको छ भने पनि रकम फिर्ता दिने गरिएको अधिकारीहरूको भनाइ छ।</p>
<p>आजदेखि माध्यमिक तथा प्राथमिक विद्यालयका विद्यार्थीहरूलाई अनलाइन अध्ययन अध्यापनमा जोड दिन लगाइएको छ।</p>
<p>बेइजिङ्‍का सार्वजनिक स्थलहरूमा आवतजावत गर्न पनि कडाइ गरिएको समाचारमा जनाइएको छ। <em>रासस/पीटीआई</em></p>
प्रतिक्रिया दिनुहोस्
.jpg)
