सरकारको स्वीकृतीपछि यूएस ओपन अगस्ट अन्तिममा हुने
<p>काठमाडौं। न्युयोर्कका गभर्नर एन्ड्रयू कुओमोले स्वीकृती दिएपछि यूएस ओपन ग्रान्डस्लाम प्रतियोगिता खाली रंगशालामा ३१ अगस्‍टदेखि १३ सेप्‍टेम्बरसम्म हुने भएको छ। </p>
<p>केही खेलाडीले न्युयोर्क भ्रमण गर्न चिन्ता व्यक्त गरे पनि प्रतियोगिता फ्ल्यासिङ मिडोजमै आयोजना हुने भएको छ। कोरोना भाइरस संक्रमणका कारण गत मार्चयता कुनै पनि व्यावसायिक टेनिस प्रतियोगिता भएका छैनन्। </p>
<p>‘‘हामी भौतिक दूरी कायम गरी टेनिसलाई आदर्श खेलका रूपमा प्रदर्शन गर्न सक्छौं,’’ अमेरिकी टेनिस संघका प्रमुख माइक डोउसेले भने। </p>
<p>गभर्नर कुओमोले खेलाडीको स्वास्थ्य सुरक्षाका लागि कोरोना भाइरस परिक्षण, थप ‘लकर रूम’सहित अतिरिक्त सावधानी अपनाउन निर्देशन दिएका छन्। </p>
<p>कोभिड-१९ बाट संक्रमित हुने र मृत्यु हुनेको संख्या अमेरिकामा सबभन्दा धेरै छ। त्यसमध्ये न्युयोर्क पनि सबैभन्दा प्रभावित राज्यमध्ये एक हो। त्यहाँ ३० हजारभन्दा धेरैले ज्यान गुमाइसकेका छन्। </p>
<p>‘‘यो चुनौतीपूर्ण समयमा हामी विश्‍वव्यापी खेलकुदमध्येको एक प्रतियोगिता आयोजना गर्ने ठूलो जिम्मेवारीमा छौं,’’ अमेरिका टेनिस संघले जारी गरेको विज्ञप्तीमा भनिएको छ, ‘‘हामी सम्भावित जोखिमहरूलाई कम गर्दै सरक्षित ढंगले प्रतियोगता आयोजना गर्न सक्छौं।’’</p>
<p>प्रतियोगिताबारे विस्तृत जानकारी बुधबार सार्वजनिक गरिने बताइएको छ।</p>
प्रतिक्रिया दिनुहोस्
.jpg)
