नेपालगञ्ज मेडिकल कलेजमा मृत्यु भएकी महिलामा कोरोना संक्रमण पुष्टि, शव व्यवस्थापनको तयारी
<p>काठमाडौं। बाँकेको कोहलपुरस्थित नेपालगञ्‍ज मेडिकल कजेल शिक्षण अस्पतालमा मृत्यु भएकी एक महिलामा कोरोना संक्रमण पुष्टि भएको छ।</p>
<p>शिक्षण अस्पतालमा उपचाररत बैजनाथ गाउँपालिका ६ की ४६ वर्षीया महिलाको मृत्यु भएको हो। बैजनाथ ६ का वडाध्यक्ष भद्रबहादुर बस्‍नेतले १ असार साँझ अस्पतालको आइसीयूमा उनको मृत्यु भएको जानकारी दिए। </p>
<p>“उनको मृत्यु हुनु २ घण्टाअघि कोरोना परीक्षणका लागि थ्रोट स्वाबको नमुना संकलन गरिएको थियो,” उनले भने, “स्वाब संकलन गरेको साँझ नै उनको मृत्यु भएको थियो। हिजो साँझ आएको रिपोर्टमा मृतक महिलामा कोरोना संक्रमण पुष्टि भएको छ।”</p>
<p>उनी फोक्सो, मिर्गौला र प्यारालाइसिसको समस्याबाट ग्रसित रहेको उनले जानकारी दिए। ३० जेठमा उनको स्वास्थ्यमा गम्भीर समस्या भएपछि उपचारका लागि अस्पताल भर्ना गरिएको थियो।</p>
<p>वडाध्यक्ष बस्‍नेतले मृतकको शव व्यवस्थापनको तयारी भइरहेको जानकारी दिए। “नेपाली सेनाले सुरक्षित रूपमा शव व्यवस्थापन गर्नेछ,” उनले भने, “यसबारे मृतकको परिवारलाई जानकारी गराइसकिएको छ।”</p>
<p>बाँकेमा यसअघि नरैनापुर गाउँपालिका ५ को क्‍वारेन्टाइनमा भारतबाट आएका एक युवकको पनि कोरोना संक्रमणका कारणले मृत्यु भएको थियो। यससँगै नेपालमा कोरोनाबाट मृत्यु हुनेको संख्या २० पुगेको छ। स्वास्थ्य तथा जनसंख्या मन्त्रालयले यसअघि १९ जनाको कोरोना संक्रमणका कारणले मृत्यु भएको पुष्टि गरिसकेको छ। नेपालगञ्‍ज मेडिकल कलेजमा मृत्यु भएकी महिलाको विषयमा भने मन्त्रालयले अहिलेसम्म आधिकारिक पुष्टि गरिसकेको छैन।</p>
प्रतिक्रिया दिनुहोस्
.jpg)
