क्वारेन्टाइनमा बस्नेको समस्या- भनेको मान्नु कि नमान्नु !
<p>कैलाली। डोटीको शिखर नगरपालिकास्थित आधारभूत माध्यामिक विद्यालयमा बनाइएको क्‍वारेन्टाइनमा बसेकाहरूलाई गलत सूचना दिँदा समुदायमा त्रास पैदा भएको छ।</p>
<p>१९ जेठमा जिल्ला स्वास्थ्य कार्यालय डोटीले भारतबाट आएर क्‍वारेन्टाइनमा बसेका २६ जनाको स्वाब संकलन गरी परीक्षणका लागि धनगढी पठायो। ३० जेठमा उनीहरू सबैको रिपोर्ट नेगेटिभ आएको बताउँदै स्थानीय तहले होम क्‍वारेन्टाइनमा बस्‍नु भन्दै विदाइ गर्‍यो।</p>
<blockquote>
<p>रिपोर्ट नेगेटिभ आएकाहरू ढुक्कले परिवारमा घुलमिल भए। स्थानीय तहले दिएको निर्देशनको वास्ता नगरी परिवार र साथीभाइसँग ढुक्कले घुलमिल भएका उनीहरू तीन दिनपछि डराए। कारण- क्‍वारेन्टाइनमा बसेकामध्ये १५ जनामा कोरोना संक्रमण पुष्‍टि भएको ३२ जेठमा खबर आयो।</p>
</blockquote>
<p>रिपोर्ट नेगेटिभ आएकाहरू ढुक्कले परिवारमा घुलमिल भए। स्थानीय तहले दिएको निर्देशनको वास्ता नगरी परिवार र साथीभाइसँग ढुक्कले घुलमिल भएका उनीहरू तीन दिनपछि डराए। कारण- क्‍वारेन्टाइनमा बसेकामध्ये १५ जनामा कोरोना संक्रमण पुष्‍टि भएको ३२ जेठमा खबर आयो।</p>
<p>‘म त भलिबल खेल्न गएको थिएँ, मैदानमै एक जनाले पोजिटिभ भएको खबर दिए,’ १८ वर्षीय युवक भन्छन्, ‘शुरुमा विश्‍वासै गर्न गाह्रो भयो तर विश्‍वास नगरी के गर्नु ?’</p>
<p>उनी स्थानीय मटेला भन्ने ठाउँमा भएको भलिबल प्रतियोगितामा समेत सहभागी भएका थिए, जहाँ चार टीम सहभागी थिए। भलिबल खेल्न त्यहीँ पुगेका संक्रमित युवकले खेलाडी र दर्शक गरी ५०-६० जना सहभागी भएको बताए।</p>
<p>संक्रमित युवकलाई समेत रिपोर्ट नेगेटिभ आएको भन्दै ३० जेठमा क्‍वारेन्टाइनबाट बिदा गरिएको थियो।</p>
<p>भारतबाट आएका उनी कोरोना नेगिटिभ आएकामा निकै खुशी थिए। संक्रमण भएको छैन भनेपछि छोराछोरीसँग पनि रमाए। ‘गाउँले सबैसँग ढोगभेट गर्न गएँ,’ ती युवकले भने, ‘फेरि संक्रमित भएको खबर आयो, हिजोदेखि अलग बसेको छु।’</p>
<p>आली गाउँमा एक सय ५२ परिवार छन्। १५ जना संक्रमित दुई दिनसम्म गाउँमा घुलमिल भएका छन्। त्यसले गाउँवासीमा त्रास बढेको संक्रमित युवक बताउँछन्।</p>
<p>अहिलेसम्म जनप्रतिनिधि, स्वास्थ्यकर्मी र सुरक्षाकर्मी कोही पनि नआएको उनले बताए। गाउँका सबैको पीसीआर परीक्षण गर्नुपर्ने बताउँदै गलत सूचना दिनेलाई कारवाही गर्न उनले माग गरेका छन्।</p>
<p>नगर स्वास्थ्य एकाइ प्रमुख हरिश शाहले आफूहरूले गलत सूचना नदिएको दाबी गरे। उनीलाई दुई-चार दिन बस्‍न अनुरोध गरिएको उनको दाबी छ। स्वास्थ्य प्रमुख शाहले नगरपालिकासँग कुरा भइरहेको बताउँदै संक्रमित सबैलाई छुट्टै बस्‍न भनिएको बताए।</p>
प्रतिक्रिया दिनुहोस्
.jpg)
