सुदूरपश्चिमबाट २७ दिनमा एक लाखभन्दा बढी नेपाली स्वदेश फर्किए
<p>कैलाली। ७ जेठयता कैलालीको त्रिनगर र कञ्‍चनपुरको गड्डाचौकी नाका भएर एक लाखभन्दा बढी नेपाली स्वदेश फर्किएका छन्।</p>
<p>यो आँकडा हिजोसम्मको हो। भारतका विभिन्‍न शहरमा रोजगारीमा रहेका उनीहरू कोरोना भाइरसका कारण उत्पन्‍न संकटबाट पार पाउन स्वदेश फिरेका हुन्।</p>
<p>जिल्ला प्रशासन कार्यालय कञ्‍चनपुरका अनुसार १२ जेठयता हिजोसम्ममा गड्डाचौकीबाट २८ हजार ३३९ जना नेपाल भित्रिएका छन्।</p>
<p>यस्तै, जिल्ला प्रशासन कार्यालय कैलालीले ७ जेठदेखि हिजोसम्ममा ८२ हजार १६३ जना नेपाली भारतका विभिन्‍न शहरबाट त्रिनगर नाका हुँदै नेपाल भित्रिएका छन्।</p>
<p>जिल्ला प्रशासन कार्यालय कैलालीका सूचना अधिकारी शिवराज जोशीले पहिलेको तुलनामा स्वदेश आउने नेपालीको संख्यामा कमी आएको बताए। शुरुमा आउँदा भिडभाड हुने डरले केही आजभोलि आउने गरेको र भारततर्फ समेत लकडाउन खुकुलो भएका कारण स्वदेश फर्किने संख्या कम भएको हुन सक्ने उनको भनाइ छ।</p>
<p>यस्तै लकडाउन शुरु भएपछि ११ चैतयता गड्डाचौकी, त्रिनगर, बैतडीको झुलाघाट र दार्चुला नाका हुँदै दुई लाखभन्दा बढी नेपाली स्वदेश फर्केका छन्।</p>
<p>संघीय सरकारको नीतिका कारण करिब डेढ महीनासम्म ठप्प रहेका यी नाकामध्ये कैलालीको त्रिनगर भने २ जेठदेखि ४ जेठसम्म खोलिएको थियो। फेरि तीन दिन बन्द गरेर पुनः ७ जेठमा खोलिएको थियो।</p>
प्रतिक्रिया दिनुहोस्
.jpg)
