औबमेयाङ आर्सनलमै बस्नेमा प्रशिक्षक आर्टेटा विश्वस्त
<p>काठमाडौं। आर्सनलका मुख्य प्रशिक्षक माइकल अर्टेटा ३० वर्षे पिइरे–इमिरिक औबमेयाङले क्लबसँग नयाँ सम्झैता गर्ने विश्वास व्यक्त गरेका छन्।</p>
<p>आर्सनलसँग औबमेयाङको सम्झाैता २०२१ जुनमा समाप्त हुनेछ।</p>
<p>यस्तो अवस्थामा औबमेयाङलाई आर्सनलमा बस्दा के फाइदा हुन्छ भनेर सम्झाउनुपर्ने अर्टेटाको बताउँछन्।</p>
<p>‘‘उनले यहाँ बस्दाको महत्त्व बुझ्नु पर्दछ। उनले यो क्लब हाम्रो हो भन्ने विश्वास गर्नुपर्छ र हामी उनलाई चाहन्छौं भन्ने बुझ्नुपर्छ’’, आर्टेटाले भने।</p>
<p>गाबोनका फरवार्ड औबमेयाङले क्लबसँगको नयाँ सम्झाैताबारे निर्णय लिनु करिअरकै महत्त्वपूर्ण हुने बताएका थिए। जर्मन बुन्डेसलिगाको टीम बोरुसिया डर्टमण्डबाट २०१८ मा आर्सनल आएका औबमेयाङले ९७ खेलमा ६१ गोल गरिसकेका छन्।</p>
<p>आर्टेटाले थपे, ‘‘अहिलेको अवस्थामा उनले जुन प्रदर्शन र व्यवहार गरेका छन्, त्यसबाट म धेरै खुशी छु। म उनीसँग राम्रो सम्बन्ध कायम राख्न चाहन्छु। हामी आमनेसामने बसेर छलफल गर्न सक्छौं। उनी क्लबमा खुशी छन् भन्नेमा म विश्वस्त छु।’’</p>
<p>आर्टेटाले यस्तो बताइरहँदा औबमेयाङले भने फ्रान्सको एक फुटबल कार्यक्रममा क्लबले आफूलाई कुनै प्रस्ताव नगरेको बताएका थिए।</p>
<p>‘‘मैले केही महिनाअघि क्लबसँग कुरा गरेको थिएँ। तर, अहिलेसम्म किन केही भएको छैन भनेर उहाँहरूलाई नै सोध्नुपर्छ’’, औबमेयाङले भने, ‘‘यो मेरो करिअरको महत्त्वपूर्ण क्षण हो। र, म सबैसँग इमान्दार हुन चाहन्छु। साँचो उनीहरूसँग छ। म क्लबमा बस्ने नबस्ने उनीहरूको काममा निर्भर गर्छ। हेरौं के हुन्छ। पक्कै पनि मलाई यो समय निर्णय गर्न निकै कठिन हुनेछ।’’</p>
<p>कोभिड–१९ महमारीका कारण लिग स्थगित हुनुअघि आर्टेटाले औबमेयाङलाई कुनै पनि हालतमा क्लबमै राख्ने बताएका थिए। उनले सिजन सकिनुअघि नै क्लबले उनीसँग नयाँ सम्झैताका लागि कुरा गर्ने बताएका थिए।</p>
<p>औबमेयाङलाई बार्सिलोना र इन्टर मिलानले चासो देखाइराखेका छन्।</p>
<p>आर्सनल अहिले इङ्लिस प्रिमियर लिगको नवौं स्थानमा छ। प्रिमियर लिग पुनः शुरू हुँदा आर्सनलले भाेलि दोस्रो स्थानको म्यानचेस्टर सिटीको भ्रमण गर्नेछ।</p>
प्रतिक्रिया दिनुहोस्
.jpg)
