न्युजिल्यान्डमा फेरि देखियो कोरोना संक्रमण
<p>वेलिङ्टन। कोरोना भाइरस संक्रमण शून्य भएको घोषणा गरेको न्युजिल्यान्डमा २४ दिनपछि फेरि संक्रमण देखिएको छ।</p>
<p>स्वास्थ्य मन्त्रालयले दुई जनामा संक्रमण देखिएको पुष्‍टि गरेको छ। दुवै बिरामी स्थानीय स्तरमै संक्रमणका भने होइनन्। दुवै हालै बेलायतबाट स्वदेश फिरेका थिए। र, दुवै आफन्त पनि हुन्।</p>
<p>एक मृत व्यक्तिको अन्त्येष्‍टीको सन्दर्भमा उनीहरूले स्वदेश आउने छुट पाएका थिए।</p>
<p>गत साता मात्रै न्युजिल्यान्ड सरकारले देशलाई कोरोना भाइरसमुक्त घोषणा गरेको थियो। र, लकडाउन पूर्ण रूपमा हटाएको थियो।</p>
<p>अन्य मुलुकका नागरिक न्युजिल्यान्ड जान अझै प्रतिबन्ध भए पनि न्युजिल्यान्डका नागरिकलाई भने स्वदेश फर्किन निषेध गरिएको छैन।</p>
<p>प्रधानमन्त्री जेसिन्डा आर्डनले देशमा पुनः कोरोना भाइरसको संक्रमण हुन सक्ने बताउँदै सतर्क रहन यसअघि आग्रह गरेकी थिइन्।</p>
<p>न्युजिल्यान्डमा कुल संक्रमित संख्या एक हजार पाँच सय ६ पुगेको छ। तीमध्ये २२ जनाले ज्यान गुमाएका छन्।</p>
प्रतिक्रिया दिनुहोस्
.jpg)
