गाउँमा कोभिड-१९ बारे अध्ययन गरौंः भारत सरकार
<p>नयाँदिल्ली। भारत सरकारले कलेजहरूलाई कोभिड-१९ बाट अति प्रभावित गाउँहरूमा पुगेर अध्ययन गर्न आग्रह गरेको छ।</p>
<p>त्यसबाट सन् १९१८ मा एच१एन१ भाइरसको महामारी र स्पेनिस फ्लु नियन्त्रणमा लिन अपनाइएका विधिबारे जानकारी हुने सरकारको आकलन छ।</p>
<p>१२ जुनमा देशभरका कलेजलाई पत्र लेख्दै सरकारले यस्तो आग्रह गरेको हो। सरकारका तर्फबाट विश्वविद्यालय अनुदान आयोगले कोभिड-१९ महामारीको प्रभाव विश्लेषण गर्न आग्रह गरेको छ।</p>
<p>आ-आफ्नो क्षेत्रका ५-६ वटा गाउँमा पुगेर गम्भीर अध्ययन गर्न कलेजहरूलाई आयोगले आग्रह गरेको छ।</p>
<p>अनलाइन न्युजपोर्टल ‘द प्रिन्ट’का अनुसार गाउँहरूले कोभिड-१९ को चुनौतिमाथि विजय पाउन अपनाएका रणनीतिहरूबारे विस्तृत खोजी गर्न आयोगले आग्रह गरेको छ।</p>
<p>त्यस क्रममा सन् १९१८ को स्पेनिस फ्लुको प्रभावबारे पनि अध्ययन गर्न भनिएको छ। “त्यस महामारीबाट निस्किन तत्कालीन भारतले अपनाएका रणनीतिबारे पनि जानकारी संकलन गर्नु आवश्यक छ,” आयोगको पत्रमा भनिएको छ।</p>
<p>उक्त महामारी पहिलो विश्वयुद्धको अन्तिमतिर शुरु भएको थियो। कोभिड-१९ जस्तै त्यो पनि श्वासप्रश्वासको बिमारी थियो।</p>
<p>कलेजहरूलाई अनुसन्धान दल खडा गर्न आग्रह गरिएको छ, जसको रिपोर्ट ३० जुनसम्ममा सरकारलाई बुझाउनुपर्नेछ।</p>
<p>अधिकारीहरूका अनुसार गाउँको तुलनामा शहरी इलाकामा कोरोना भाइरस संक्रमणको जोखिम १.०९ गुणा ज्यादा छ।</p>
प्रतिक्रिया दिनुहोस्
.jpg)
