पशुपति मन्दिर परिसर सरसफाइका लागि भारतको सहयोग
<p>काठमाडौं। पशुपति क्षेत्र मन्दिर परिसरमा सरसफाइ सुविधा निर्माण गर्न भारत सरकारले तीन करोड सात लाख २३ हजार रूपैयाँ आर्थिक सहयोग प्रदान गरेको छ।</p>
<p>सन् १९७९ देखि युनेस्कोको विश्व सम्पदा सूचीमा रहेको पशुपति क्षेत्र मन्दिर परिसरमा सरसफाइ सुविधा निर्माणका लागि भारतीय राजदूतावास, संघीय मामिला तथा सामान्य प्रशासन मन्त्रालय र काठमाडौं महानगरपालिकाबीच आज सम्झौतापत्रमा हस्ताक्षर भएको हो।</p>
<p>भारत सरकारले उच्च प्रभाव सामुदायिक विकास परियोजना (एचआइसीडीपी वा पहिले एसडीपीज) को रूपमा यस परियोजनालाई नेपाल–भारत मैत्रीः विकास साझेदारीअन्तर्गत अनुदान दिनेछ।</p>
<p>यस परियोजनाको प्रस्ताव पशुपति क्षेत्र विकास कोष (पीएडीटी) ले भारतीय राजदूतावासलाई सन् २०१९ को अक्टोबर महीनामा पठाएको थियो। यो परियोजनाको कार्यान्वयन काठमाडौं महानगरपालिकाले नेपाल सरकारले तोकेको मापदण्डअनुरूप गर्ने बताइएको छ।</p>
<p>सहमति अनुसार १५ महीनामा निर्माण कार्य सम्पन्न गर्नका लागि महानगरपालिकाले टेन्डर प्रक्रियामार्फत् उपयुक्त ठेकेदारको पहिचान गर्नेछ।</p>
<p>पशुपतिनाथ मन्दिर नेपालको प्राचीन मन्दिर हो। यहाँ हरेक दिन हजारौंको संख्यामा भक्तजनहरू आउँछन्।</p>
<p>सन् २०१४ को अगस्ट महीनामा नेपाल र भारत दुवै सरकारले सरसफाइ परियोजनामा सहमति जनाएका थिए।</p>
प्रतिक्रिया दिनुहोस्
.jpg)
