बालबालिकाको सिकाइमा थप क्षति नहोस् भनेर वैकल्पिक कार्यक्रम शुरू गरिएको हो : प्रधानमन्त्री
<p>काठमाडौं। प्रधानमन्त्री केपी शर्मा ओलीले बालबालिकाको सिकाइमा थप क्षति नहोस् र समग्र शैक्षिक सत्र प्रभावित नहोस् भन्ने उद्देश्यले आजदेखि वैकल्पिक कार्यक्रम सुरु गरिएको बताएका छन्।</p>
<p>विद्यालय तहका बालबालिकाहरुको सिकाइ निरन्तरता लक्षित कार्यक्रम शुरु भएको घोषणाका सन्दर्भमा शुभकामना मन्तव्य राख्दै प्रधानमन्त्रीले सिंगो शैक्षिक सत्र प्रभावित हुन सक्ने भएकाले नै बन्दाबन्दीको ८३ दिनपछि केही खुकुलो पारिएको बताएका हुन्।</p>
<p>“विद्यालयस्तरको सबै परीक्षा समाप्त भई दुई महिनाअघि नै हाम्रा विद्यालयहरुमा नयाँ शैक्षिक सत्र अनुरुपको कक्षा सञ्चालन भैसकेको हुनुपर्थ्यो। तर ६ महिनादेखि विश्वव्यापी रुपमा फैलिएको कोरोना भाइरस महामारीका कारण अन्य मुलुकहरुमा जस्तै हाम्रो देशमा पनि विद्यालय लगायत सबै तहका शैक्षिक संस्थाहरू बन्द छन्,” प्रधानमन्त्रीले भनेका छन्,“गत वर्षको चैत ११ गतेदेखि मुलुकमा लकडाउन शुरु गरिएको छ। त्यसयताका दिनमा देशभरका तीन हजार दुई सय भन्दा बढी विद्यालयहरू क्‍वारेन्टाइन स्थलका रुपमा प्रयोग भइरहेका छन्। माध्यमिक शिक्षा परीक्षा (एसइइ) लगायत राष्ट्रियस्तरमा गरिने कतिपय परीक्षाहरु समेत स्थगित छन्।”</p>
<p>प्रधानमन्त्रीले भाइरसको महामारी रोकिएको नभई अझै फैलिँदो रहेको भन्दै लकडाउन अन्त्य नभएको र केही खुकुलो बनाइएको बताएका छन्। प्रधानमन्त्रीले हाम्रो व्यवहार, स्वच्छन्द होइन सतर्कता सहित चालिनुपर्ने बताएका छन्।</p>
<p>“तोकिएका सबै नियमहरु पालना गरिनु पर्छ। सामाजिक दूरी कायम नगर्ने, आवश्यक सुरक्षा सतर्कता नपनाउने र मनखुशी चल्ने गरेमा आप्mना कारणले आफूमात्रै होइन, सिङ्गो परिवार, आफन्तहरु र समग्र समुदाय नै संक्रमित हुनसक्छ,” प्रधानमन्त्रीले सम्बोधनमा भने, “हाम्रा स–साना नानीहरुको सिकाइको थलो नै समुदायमा संक्रमण फैलने केन्द्र नबनोस् भन्नेमा विशेषगरी शिक्षक, स्वयंसेवक र अभिभावक लगायत सबै सचेत हुनैपर्छ।”</p>
प्रतिक्रिया दिनुहोस्
.jpg)
