सुदूरपश्चिममा थप दुई स्वास्थ्यकर्मीमा कोरोना संक्रमण
<p>कैलाली। सुदूरपश्‍चिममा थप दुईजना स्वास्थ्यकर्मीलाई कोरोना संक्रमण भएको छ।</p>
<p>धनगढीस्थित प्रयोगशालामा स्वाब परीक्षणमा कञ्‍चनपुरको लालझाडी गाउँपालिका २ का ३२ वर्षीय ल्याब असिस्टेन्ट र डडेल्धुरा अस्पतालकी २७ वर्षीया नर्समा संक्रमण पुष्टि भएको हो।</p>
<p>हिजो कोरोना पुष्टि भएका कञ्‍चनपुरका २१ जनामध्ये १४ जना लालझाडी गाउँपालिकाका छन्। तिनैमध्ये स्वास्थ्यकर्मी पनि परेका छन्।</p>
<p>हिजो नै डडेल्धुरामा २३ जनामा कोरोना संक्रमण पाइएको थियो। तीमध्ये एकजना नर्स हुन्।</p>
<p>ती नर्सको कन्ट्याक्ट ट्रेसिङको काम भइरहेको डडेल्धुरा अस्पतालका निमित्त मेडिकल सुपरिटेन्डेन्ट जगदीशचन्द्र बिष्टले बताए। उनलाई अस्पतालको आइसोलेसनमा राखिएको छ।</p>
<p>कुनै लक्षण नदेखिएका कञ्‍चनपुरका स्वास्थ्यकर्मीले भने घरमै सेल्फ क्‍वारेन्टाइनमा बसेको बताए। </p>
<p>यसअघि लालझाडी गाउँपालिकासँगै जोडिएको पुनर्वास नगरपालिकाका दुई जना स्वास्थ्यकर्मीमा पनि कोरोना पुष्टि भएको थियो। उनीहरू दुवै जना अस्पतालको आइसोलेसनमा उपचाररत छन्।</p>
प्रतिक्रिया दिनुहोस्
.jpg)
