आमाको दूधबाट कोरोना सर्दैनः डब्लूएचओ
<p>जेनेभा। कोभिड-१९ पोजिटिभ देखिएकी आमाको दूध खाँदा बच्चामा कोरोना भाइरस नसर्ने विश्‍व स्वास्थ्य संगठन (डब्लूएचओ) ले स्पष्‍ट गरेको छ।</p>
<p>डब्लूएचओका महानिर्देशक टेड्रोस अदानम गेब्रेयससले आफ्ना नवजात शिशुलाई स्तनपान जारी राख्‍न कोभिड-१९ पोजिटिभ देखिएका आमाहरूलाई अपील गरेका छन्।</p>
<p>“त्यसै पनि बयस्कको तुलनामा बालबालिकामा कोरोना भाइरस संक्रमणको जोखिम कम हुन्छ। र, अन्य बिमारीबाट आमाको दूधले बचाउँछ,” गेब्रेयससले भने, “अहिलेसम्मको अनुसन्धानबाट आमाको दूधमार्फत कोरोना भाइरसको प्रसार नहुने स्पष्‍ट छ।”</p>
<p>स्वास्थ्यस्थिति धेरै खराब नभएका आमाले बच्चालाई दूध खुवाउन रोक्नु नपर्ने उनले बताए।</p>
<p>डब्लूएचओका रिप्रोडक्टिभ हेल्थ सल्लाहकार डा. अंशु बनर्जीले आमाको दूधमा कुनै पनि प्रकारको लाइभ भाइरस अहिलेसम्म फेला नपरेको बताए। “त्यसैले आमाको दूधबाट भाइरस सर्दैन,” उनले भने।</p>
<p>अमेरिकाको सेन्टर फर डिजिज कन्ट्रोल एन्ड प्रिभेन्स (सीडीसी)ले पनि आमाको दूधबाट कुनै पनि भाइरस सरेको प्रमाण नभएको बताएको छ। तर, कोभिड-१९ पोजिटिभ देखिएका आमाहरूले बारम्बार हात धुन र मास्क लगाउन आवश्यक रहेको सीडीसीले बताएको छ।</p>
<p>बेलायती सार्वजनिक स्वास्थ्य सेवा (एनएचएस)ले पनि सोही सल्लाह दिएको छ।</p>
प्रतिक्रिया दिनुहोस्
.jpg)
