कोभिड-१९ को खोप तयार नहुँदै युरोपमा ४० करोड डोज आपूर्ति गर्ने सम्झौता
<p>लन्डन। कोरोना भाइरसविरुद्धको खोप तयार हुनासाथ युरोपेली मुलुकहरूलाई ४० करोड डोज उपलब्ध गराउने सम्झौता भएको छ।</p>
<p>युरोपको इन्क्लुसिभ भ्याक्सिन एलायन्सले औषधि निर्माता कम्पनी अस्ट्राजेनेकासँग उक्त सम्झौता गरेको हो। उक्त एलायन्समा जर्मनी, फ्रान्स, इटली र नेदरल्यान्ड्सले नेतृत्व गर्दै आएका छन्।</p>
<p>जर्मनीले हिजो दिएको जानकारीअनुसार अस्ट्राजेनेकाले उपलब्ध गराउने खोप युरोपियन युनियनका सदस्य मुलुकहरूलाई दिइनेछ।</p>
<p>उक्त कम्पनीले कोभिड-१९ महामारीलाई नियन्त्रणमा लिन नाफा बिना नै खोप आपूर्ति गर्ने घोषणा गरेको छ। र, सन् २०२० को अन्त्यसम्ममा खोप आपूर्ति गर्न सकिने कम्पनीको भनाइ छ।</p>
<p>“यदि सबै कुरा हामीले सोचेकै गतिमा अगाडि बढ्यो भने गर्मी समाप्त हुने बेलासम्ममा हामी खोप आपूर्ति गर्न थालिसकेका हुनेछौं,” कम्पनीका सीईओ पास्कल सोरियोले भने।</p>
<p>बीबीसीका अनुसार सम्झौता कति रकममा तय भएको भन्‍ने स्पष्‍ट भएको छैन। तर, त्यसका लागि जर्मनी, फ्रान्स, इटाली र नेदरल्यान्ड्सले बजेट उपलब्ध गराउने खुलेको छ। हालसम्म खोप तयार नभइसकेकाले त्यो कति प्रभावकारी हुन्छ भन्‍ने यकिन छैन। </p>
<p>अस्ट्राजेनेकासँग यसअघि अमेरिकाले सम्झौता गरिसकेको छ। अमेरिकाले उक्त कम्पनीले एक अर्ब २० करोड डलर लगानी गर्ने भएको छ। त्यसवापत अमेरिकालाई ३० करोड डोज खोप प्राप्त हुनेछ।</p>
<p>बेलायतको अक्सफोर्ड विश्‍वविद्यालय कोरोना भाइरसविरुद्धको एक भ्याक्सिनमाथि अनुसन्धान गरिरहेको छ, जसको लाइसेन्स बेलायती कम्पनी अस्ट्राजेनेकासँग छ। उक्त खोपको नाम ‘एजेडडी १२२२’ राखिएको छ।</p>
<p>गत अप्रिलमै उक्त खोपको मानिसमा परीक्षण शुरु गरिएको छ। हालसम्म करिब १० हजार स्वयंसेवक यस परीक्षणमा सामेल भइसकेका छन्।</p>
<p>हालसम्मको नतिजाका आधारमा ब्रिटिस मेडिसिन्स एन्ड हेल्थकेयर प्रोडक्ट्स रेगुलेटरी एजेन्सीले तेस्रो चरणको परीक्षणका लागि अनुमति दिएको छ।</p>
प्रतिक्रिया दिनुहोस्
.jpg)
