तीन महीनामा सुदूरपश्चिमबाट भित्रिए दुई लाख ६५ हजार नेपाली
<p>कैलाली। तीन महीनायता भारतबाट सुदूरपश्‍चिम प्रदेशका नाका हुँदै अढाइ लाखभन्दा बढी नेपाली स्वदेश फर्किएका छन्।</p>
<p>प्रदेशको सामाजिक विकास मन्त्रालयका अनुसार गत २३ फागुनयता सुदूरपश्‍चिमका चार नाकाबाट करिब दुई लाख ६५ हजार नेपाली स्वदेश फर्किएका हुन्।</p>
<p>कैलालीको त्रिनगर, कञ्‍चनपुरको गड्डाचौकी, बैतडीको झुलाघाट र दार्चुला नाका हुँदै उनीहरू नेपाल भित्रिएका हुन्। २ जेठयता मात्र एक लाखभन्दा बढी नागरिक स्वदेश फर्किएको सामाजिक विकास मन्त्री कृष्ण सुवेदीले जानकारी दिए।</p>
<p>मन्त्रालयको अनुसार २३ फागुनदेखि ९ चैतसम्म एक लाख ४३ हजार तीन सय २५ नेपाली भित्रिएका छन्। यस्तै, चैत १० र ११ मा १६ हजारभन्दा धेरै नेपाली स्वदेश फिरेका छन्।</p>
<p>ती महीनायता कैलालीको त्रिनगर नाकाबाट सबैभन्दा धेरै स्वदेश फर्किएका छन्। त्यसपछि कञ्‍चनपुरको गड्डाचौकी, बैतडीको झुलाघाट र दार्चुला नाकाबाट नेपाल भित्रिएका छन्।</p>
<p><strong>पीसीआर परीक्षण न्यून</strong><br />
स्वदेश फर्किनेको संख्या दुई लाख ६५ हजार भए पनि करिब आठ हजार दुई सय ५२ जनाको मात्र पीसीआर विधिबाट कोरोना परीक्षण भएको छ।</p>
<p>स्वास्थ्य निर्देशनालय डोटीका अनुसार हालसम्म नौ हजार नौ सय २४ जनाको स्वाब संकलन गरिएको छ।</p>
<p>हालसम्म परीक्षण भएकामध्ये एक सय ८८ जनामा कोरोना संक्रमण देखिएको छ। सुदूरपश्‍चिममा दुई जनाको मृत्यु भइसकेको छ।</p>
<p>हाल सुदूरपश्‍चिम प्रदेशका विभिन्‍न क्‍वारेन्टाइनमा ६४ हजार चार सय ५३ जना छन्। पीसीआर परीक्षणका लागि उनीहरूको नमूना संकलन भएको छैन।</p>
<p>प्रदेशभरमा एउटै प्रयोगशाला भएकाले कोरोना परीक्षणमा ढिलाइ भएको प्रदेश सरकारका स्वास्थ्य निर्देशक गुणराज अवस्थीले बताए। स्वाब संकलन गर्दा पनि त्यसको परीक्षण गर्न समस्या भएको उनले बताए।</p>
प्रतिक्रिया दिनुहोस्
.jpg)
