चितवनको माडी नगरक्षेत्रमा प्रवेश प्रतिबन्धित
<p>भरतपुर। चितवनको माडी नगरपालिकालाई पाँच दिनका लागि सिल गरिएको छ। नगरस्तरीय कोरोना रोकथाम तथा नियन्त्रण समन्वय समितिको हिजोको बैठकले आजदेखि लागू हुने गरी नगरलाई नै सिल गर्ने निर्णय गरेको हो।</p>
<p>अत्यावश्यक सवारी साधनबाहेक अन्यलाई माडी प्रवेश गर्न र बाहिरिन बन्देज लगाइएको नगरप्रमुख ठाकुरप्रसाद ढकालले जानकारी दिए। नगरपालिकामा संक्रमित बढ्न थालेपछि यस्तो निर्णय लिइएको उनले बताए।</p>
<p>माडीभित्र पनि सबै मोटरसाइकल, अटो, टेम्पोलगायत सवारी साधन चलाउन पूर्ण रूपमा रोक लगाइएको छ।</p>
<p>अत्यावश्यक सेवा प्रदायक संस्था र पसलबाहेक सबै संघसंस्था र पसल पूर्ण रूपमा बन्द गरिएको छ। अत्यावश्यक कामले घरबाहिर निस्कनुपरेमा सुरक्षाकर्मीलाई जानकारी गराउनु पर्नेछ। भौतिक दूरी कायम गर्दै मास्कको अनिवार्य प्रयोग तथा संघसंस्था र पसलमा हात धुने व्यवस्था गर्नुपर्ने नियम पनि लागू गरिएको छ।</p>
<p>गत सोमबार माडीमा पहिलोपटक ६ जनामा कोरोना संक्रमण पुष्‍टि भएको थियो। भारतबाट आएका उनीहरू स्थानीय सोमेश्‍वर माविको क्‍वारेन्टाइनमा बसिरहेका थिए। सबैको भरतपुर कोरोना विशेष अस्पतालमा उपचार भइरहेको छ। <em><strong>रासस</strong></em></p>
प्रतिक्रिया दिनुहोस्
.jpg)
