चीनमा औषधिका लागि पनि हुने छैन शालकको शिकार
<p>बेइजिङ। चीनले औषधिका लागि पनि शालकको शिकार गर्न प्रतिबन्ध लगाएको छ।</p>
<p>चिनियाँ परम्परागत औषधिका लागि शालकको प्रयोग हुने गरेको छ। सरकारको पछिल्लो कदमबाट शालकको अनियन्त्रित शिकार रोकिने अपेक्षा गरिएको छ।</p>
<p>कोभिड-१९ को महामारी फैलिएयता चीनले वन्यजन्तुको संरक्षण प्रयास बढाएको छ। खासगरी, शालकको खपटा चिनियाँ परम्परागत औषधि बनाउन प्रयोग गरिँदै आएको थियो। र, चिनियाँहरूले मासु स्वादिष्‍ट भएको बताउँदै शालकको शिकार गर्ने गरेका थिए।</p>
<p>चीनमा संसारभरबाट यस स्तनधारी जनावरको तस्करी हुने गरेको छ। सोही कारण यस लजालु वन्यजन्तुका आठवटा प्रजाति लोप हुने जोखिममा छन्।</p>
<p>वन्यजन्तु संरक्षणमा लागेका अभियन्ताहरूले चीन सरकारको पछिल्लो कदमको स्वागत गरेका छन्। ‘सेभ पेंगोलिन’ अभियानका पल थम्सन यसलाई शालकको संरक्षणका लागि एक सुन्दर कदमको संज्ञा दिन्छन्।</p>
<p>“चीन सरकारको यो कदम वन्यजन्तु संरक्षणमा गेम चेन्जर हुन सक्छ,” उनी भन्छन्, “हामीलाई यसैको प्रतीक्षा थियो।” आगामी दिनमा सरकारले आफ्नो नियम कडाइका साथ पालना गर्ने र उपभोक्ताले व्यवहारमा परिवर्तन ल्याउने उनको अपेक्षा छ।</p>
<p>वर्ल्ड एनिमल प्रोटेक्सनका क्याथरिन वाइजले पनि यसलाई एक शानदार समाचार संज्ञा दिए। “चीन सरकारले यसलाई उच्चतमस्तरको सुरक्षित प्रजातिको सूचीमा राखेको थियो, जुन अब हट्यो,” उनी भन्छिन्।</p>
<p>चीनमा अन्य वन्यजन्तुका लागि पनि उक्त नियम लागू हुनुपर्ने उनी बताउँछिन्।</p>
<p>शालकलाई कोरोना भाइरसको वाहक वन्यजन्तु मानिएको छ। वैज्ञानिकहरू यसबारे अध्ययनमा जुटेका छन्।</p>
प्रतिक्रिया दिनुहोस्
.jpg)
