सुदूरपश्चिममा संक्रमित संख्या १५८
<p>कैलाली। सुदूरपश्‍चिममा हिजो थप ११ जनामा कोरोना संक्रमण पुष्टि भएसँगै संक्रमितको संख्या १५८ पुगेको छ।</p>
<p>धनगढीस्थित कोरोना परीक्षण प्रयोगशालामा थप १० र अछामकी एक गर्भवतीको कोहलपुर मेडिकल कलेजमा कोरोना संक्रमण पुष्टि भएको हो।</p>
<p>परीक्षणमा कैलालीका ७, कञ्‍चनपुर, डडेल्धुरा र दार्चुलाका एक-एक जनामा संक्रमण पुष्टि भएको सेती प्रादेशिक अस्पतालका सूचना अधिकारी दिलिपकुमार श्रेष्ठले जानकारी दिए।</p>
<p>हिजो कोरोना पुष्टि भएका कैलालीको टीकापुर नगरपालिकाका २३, २४, ३६ र ४० वर्षीय पुरुष, धनगढी उपमहानगरपालिकाका दुई वर्षीया बालिका र २८ वर्षीय महिला तथा मोहन्याल गाउँपालिकाका १७ वर्षीय युवकमा संक्रमण पुष्टि भएको हो।</p>
<p>यस्तै, डडेल्धुराको नवदुर्गा गाउँपालिकाका २२ वर्षीय युवक, दार्चुलाको लेकम गाउँपालिकाका २६ वर्षीय युवक, कञ्‍चनपुरको शुक्लाफाँटा नगरपालिकाका २५ वर्षीय युवकमा कोरोना पुष्टि भएको हो। </p>
<p><strong>सबैभन्दा बढी कैलालीमा</strong><br />
हालसम्म सबैभन्दा बढी कैलालीका ५५ जनामा संक्रमण देखिएको छ। तीमध्ये एक जनाको मृत्यु भएको छ भने नौ जना उपचारपछि घर फर्केका छन। बाँकी ४५ जनाको उपचार भइरहेको छ। एक जनालाई थप उपचारका लागि काठमाडौं पठाइएको छ।</p>
<p>यस्तै, कञ्‍चनपुरमा ३३ जनामा संक्रमण देखिएको छ। तीमध्ये एक जना उपचारपछि घर फिरेका छन् भने ३२ जना उपचाररत छन्।</p>
<p>अछाममा संक्रमितको संख्या १६ पुगेको छ। एक जना निको भएका छन्। दुई जनालाई निको नहुँदै अस्पतालबाट डिस्चार्ज गरिएको छ। १३ जना उपचारमा छन्।</p>
<p>डडेल्धुरामा संक्रमित संख्या १५ पुगेको छ। तीमध्ये एक जना उपचारपछि घर फर्केका छन् भने १४ जना उपचारमा छन्।</p>
<p>दार्चुलामा संक्रमित १२ जना पुगेका छन्। तीमध्ये एक जना ठीक भइसकेका छन् भने ११ जनाको उपचार भइरहेको छ।</p>
<p>डोटीका १० जनामा संक्रमण देखिएको छ, सबै उपचारत छन्। बझाङमा संक्रमित आठ जना पुगेका छन्। सबैको उपचार भइरहेको छ।</p>
<p>बैतडीमा ६ जनामा संक्रमण देखिएको छ। एक जना उपचारपछि अस्पतालबाट डिस्चार्ज भएका छन् भने चार जनालाई निको नभई अस्पतालबाट डिस्चार्ज गरिएको छ। एक जनाको उपचार भइरहेको छ। </p>
<p>यस्तै, बाजुराका तीन जनामा कोरोना पुष्टि भएकोमा एक जनाको मृत्यु भएको छ भने दुई जनाको उपचार भइरहेको छ।</p>
<p>सुदुरपश्‍चिममा कोरोना पुष्टि भएका दुई जनाको मृत्यु भएको छ भने १९ जना उपचारपछि घर फिरेका छन्। हालसम्म धनगढीको प्रयोगशालाबाट १४०, सुर्खेतबाट १२, राष्ट्रिय जनस्वास्थ्य प्रयोगशालाबाट ५ र दाङको प्रयोगशालाबाट एक जनामा कोरोना पुष्टि भएको छ।</p>
प्रतिक्रिया दिनुहोस्
.jpg)
