सिरहाका २० जनाले जिते कोरोना भाइरसलाई
<p>लहान। सिरहाको धनगढीमाई नगरपालिकास्थित महेन्द्र गेनाई मेमोरियल अस्पतालबाट २० जना कोरोनालाई जितेर हिजो घर फिरेका छन्।</p>
<p>उक्त अस्पतालको आइसोलेसनमा २६ जनाको उपचार भइरहेको थियो। तीमध्येका २० जना एकै दिन कोरोना भाइरस संक्रमण मुक्त भएर घर फर्किएको अस्पतालका मेडिकल सुपरिटेन्डेन्ट डा. सुभाष मण्डलले जानकारी दिए।</p>
<p>उपचारपछि घर फर्किनेमा सिरहाका १९ र सप्तरीका एक जना छन्। बाँकी ६ जनाको पनि स्वास्थ्य अवस्था सामान्य रहेको र उनीहरू पनि केही दिनभित्रै घर फर्किने डा. मण्डलले बताए।</p>
<p>यसैबीच, सिरहामा एकै दिन थप १२ जनामा कोभिड-१९ पोजिटिभ देखिएको छ। उनीहरूलाई अस्पताल ल्याउने तयारी भइरहेको प्रमुख जिल्ला अधिकारी सरोजप्रसाद गुरागाईंले बताए।</p>
<p>थपिएका संक्रमितमा सिरहा नगरपालिकाका १० तथा सुखीपुर र बरियारपट्टी गाउँपालिकाका १-१ जना छन्। यससँगै सिरहामा कोरोना संक्रमितको संख्या ६१ पुगेको छ। <em><strong>रासस</strong></em></p>
प्रतिक्रिया दिनुहोस्
.jpg)
