भरतपुर अस्पतालको आईसीयूमा एक कोरोना संक्रमितको मृत्यु
<p>काठमाडौं। भरतपुर अस्पतालको आईसीयूमा एकजना कोरोना संक्रमित व्यक्तिको मृत्यु भएको छ।</p>
<p>अस्पतालका मेडिकल सुपरिटेन्डेन्ट डा. श्रीराम तिवारीले आज बिहान ७ बजे आईसीयूमा रहेका ६८ वर्षीय संक्रमितको मृत्यु भएको जानकारी दिए।</p>
<p>भरतपुर महानगरपालिका ११ घर भएका ती बिरामीमा हिजो मात्रै कोभिड–१९ को संक्रमण पुष्टि भएको थियो।</p>
<p>स्वास्थ्य अवस्था जटिल रहेका ती बिरामीको पाँच दिनदेखि नारायणी सामुदायिक अस्पतालको आईसीयूमा राखेर उपचार भइरहेको थियो। संक्रमण पुष्टि भएपछि उक्त सामुदायिक अस्पतालले उपचार नगर्ने भन्दै भरतपुर अस्पतालतर्फ पठाएको थियो।</p>
<p>“क्रिटिकल अवस्थाका बिरामीलाई यहाँ अहिले नै नल्याएर त्यही आईसीयूमै उपचार हुन दिन हामीले भनेका थियौं,” भरतपुर अस्पतालका प्रमुख डा. तिवारीले भने, “त्यहाँबाट हिजो साँझ ६ बजे यहाँ ल्याएर राखियो। उपचार भइरहेका बेला नै आज बिहान मृत्यु भयो।”</p>
<p>तिवारीले गम्भीर अवस्थाको बिरामीलाई आईसीयूबाट त्यसरी निकालेर ल्याउँदा थप जोखिम भएको हुन सक्ने बताए। मृतक मुटु र दमरोगबाट पनि ग्रसित थिए। उनको शव भरतपुर अस्पतालको आईसीयूमै राखिएको छ।</p>
<p>शवको व्यवस्थापन कसरी गर्ने भन्ने निर्णय गर्न बाँकी नै छ । शव व्यवस्थापनका लागि स्थानीय प्रशासन र नेपाली सेनालाई जानकारी गराइसकिएको मेडिकल सुपरिटेन्डेन्ट तिवारीले बताए। नारायणी अस्पतालले आईसीयूबाट बाहिर निकालेर अक्सिजनको भरमा बिरामीलाई भरतपुर अस्पतालमा ल्याएको थियो।</p>
प्रतिक्रिया दिनुहोस्
.jpg)
