मौसममा अचानक बदली, अपरान्हपछि यी ठाउँमा पानी पर्ने
<p>काठमाडौं। आज बिहानदेखि खुलेको मौसम अधिकांस स्थानमा बदली हुने मौसम पूर्वानुमान महाशाखाले जनाएको छ।</p>
<p>स्थानीय वायु र पश्चिमी वायुका साथै भारतको पूर्वी उत्तर प्रदेश तथा विहारमा रहेको निम्न चापीय प्रणालीको प्रभावले आज अपरान्‍हपछि अधिकांश भूभागमा वर्षाको सम्भावना रहेको मौसमविद् मञ्जु बासीले बताइन्।</p>
<p>गएराति विकसित भएको भारी वर्षा गराउने प्रणाली भने हटिसकेको छ। </p>
<p>“अहिले फेरि यी चार प्रणाली विकसित भई सक्रिय अवस्थामा रहेकाले पुनः वर्षाको सम्भावना रहेको हो”, वासीले भनिन्।</p>
<p>नेपालमा मनसुन भित्रिने सरदर समय १० जुन हो। तर, यस वर्ष औसत समयभन्दा केही ढीलो मनसुन भित्रिने भएको छ। मनसुन शुरू हुनुपूर्व जुन किसिमको वातावरण हुनपर्ने हो त्यो बनिसकेको छैन।</p>
<p>मौसमविद्का अनुसार मनसुन भित्रिनका लागि मनसुनी हावा वायुमण्डलको तल्लो सतहदेखि माथिलो सतहसम्म रही त्यसको प्रवेश राम्रोसँग देखिन न्यून चापीय रेखा प्रष्टसँग देखिनपर्ने हुन्छ।</p>
<p>यसका साथै न्यून चापीय क्षेत्रको विकास भएर न्युन चापीय रेखा नेपालतिर परेको हुनुपर्छ।</p>
<p>अहिले बागमती प्रदेश, गण्डकी प्रदेशका भूभागमा सामान्य बदली रहेको तथा प्रदेश १ र कर्णाली प्रदेशका पहाडी भूभागमा आंशिक बदली भई बाँकी स्थानमा मौसम सामान्यतया सफा रहेको छ ।</p>
<p>दिउँसो प्रदेश १, बागमती, गण्डकी र कर्णाली प्रदेशका केही स्थानमा तथा प्रदेश २ र प्रदेश ५ र सुदूरपश्चिमका एक वा दुई स्थानमा मेघगर्जन हावाहुरीसहित वर्षाको सम्भावना रहेको महाशाखाले जनाएको छ।</p>
<p>राति प्रदेश १, बागमती प्रदेश, गण्डकी प्रदेश र कर्णाली प्रदेशका भूभागमा सामान्य बदली रही बाँकी प्रदेशमा आंशिक बदली रहने बताइएको छ।</p>
<p>पछिल्लो विवरणअनुसार आज काठमाडौं उपत्यकाको न्यूनतम तापक्रम १९ दशमलव ३ डिग्री र अधिकतम तापक्रम २८ दशमलव ७ डिग्री सेल्सियस रहेको छ।</p>
<p>आज सबैभन्दा कम जोमसोमको न्यूनतम तापक्रम १० दशमलव ५ डिग्री र सबैभन्दा बढी वीरेन्द्रनगरको अधिकतम तापक्रम ३५ दशमलव ५ डिग्री सेल्सियस रहेको छ। <em>रासस</em></p>
प्रतिक्रिया दिनुहोस्
.jpg)
