धनगढी कोरोना अस्पताल : आइसोलेसनका बेड खाली, संक्रमित क्वारेन्टाइनमै बस्न वाध्य
<p>कैलाली। धनगढीको कोरोना अस्पतालका शय्या खाली हुँदाहुँदै पनि यहाँका कोरोना संक्रमितहरू पूर्वाधार र सुविधाविनाको क्‍वारेन्टाइनमा बस्‍न बाध्य छन्।</p>
<p>कोरोना अस्पतालको ४० बेडमध्ये २३ बेडमा संक्रमितहरूलाई भर्ना गरिएको छ। १७ बेड खाली छ।</p>
<p>तर, धनगढी उपमहानगरपालिका भित्रै दुईजना संक्रमित स्थानीय विद्यालयको क्‍वारेन्टाइनमा बसिरहेका छन्।</p>
<p>लक्षण र स्वास्थ्य समस्या नदेखिएहरूलाई अस्पताल भर्ना नगर्ने स्वास्थ्य मन्त्रालयको नयाँ मापदण्ड अनुसार अस्पतालले नै उनीहरूमा लक्षण नदेखिएको भन्दै फिर्ता गरिदिएको हो।</p>
<p>भारतको दिल्लीबाट आएर धनगढी उपमहानगरपालिका-१४ फूलवारीस्थित क्वारेन्टाइनमा बसिरहेका दुई परिवारका दुईजनामा २२ जेठमा कोरोना संक्रमण पुष्‍टि भएको थियो।</p>
<p>उनीहरूलाई २३ जेठ मध्यान्ह एम्बुलेन्समा धनगढीस्थित कोरोना अस्पताल ल्याइयो । तर, तर चिकित्सकहरुले उनीहरूलाई कोरोनाको लक्षण नभएको भन्दै एम्बुलेन्सबाट झर्न नदिएर जहाँबाट आएको, त्यही फर्किन भनेको बताइएको छ।</p>
<p>अस्पतालले भर्ना नलिएपछि फर्किएर फूलवारीको पञ्चोदय माध्यामिक विद्यालयमा बसिरहे पनि अहिलेसम्म कोहि स्वास्थ्यकर्मी नआएको उनीहरूको गुनासो छ।</p>
<p>तातो पानी तताउन सामग्रीसमेत नभएपछि ह्युमानिटी फाउण्डेसन नेपालले पानी तताउन विद्युतीय जग सहयोग गरेको छ।</p>
<p>अस्पतालका चिकित्सकहरूले भने पीसीआर परीक्षणमा पोजिटिभ देखिएर लक्षण भएकाहरूलाई मात्र भर्ना गरेर उपचार गरिएको बताएका छन्।</p>
<p>एक चिकित्सकले भने, "कोरोना पोजेटिभ भएका तर लक्षण नदेखिएका संक्रमितहरुलाई जुन क्वारेन्टाईन बस्दै आएका छन्, त्यहीँ आइसोलेसन वार्ड बनाएर राख्न थालिएको छ।"</p>
प्रतिक्रिया दिनुहोस्
.jpg)
