धनगढीमा कोभिड-१९ बाट मृत्यु भएकी महिलाको टोल 'सिल', मलामीद्वारा आफूहरूको स्वाब परीक्षण गर्न माग
<p>कैलाली। धनगढी उपमहानगरपालिका-४ महिमा टोलकी एक महिलामा मृत्युपछि कोभिड-१९ पुष्टि भएपछि उनी बस्ने महिमा टोल हिजो साँझदेखि प्रहरीले 'सिल' गरेको छ।</p>
<p>प्रहरीको टोली हिजो त्यस क्षेत्रमा गएर माइकिङ गरी 'सिल' गरिएको जानकारी गराएको थियो।</p>
<p>प्रहरी नआएको र चहलपहल पूर्ववत हुन थालेपछि ती महिलाको अन्तिम संस्कारमा मलामी गएकाहरूले नै तुलसी चोकमा बोर्ड नै राखेर आवागमन अवरुद्ध गरेका छन् ।</p>
<p>पुरै टोल 'सिल' गरिएपछि स्थानीय बासिन्दा त्रसित छन्। उनीहरू घरबाट निस्किन डराईरहेका छन्। पसलहरू बन्द छन्।</p>
<p>दुई दिनअघि सेती प्रादेशिक अस्पतालमा मृगौलाको डायलासिसका क्रममा महिमा टोलकी एक महिलाको मृत्यु भएको थियो।</p>
<p>मृत्युपछि स्वाव संकलन गरिएकी ती महिलाको त्यसैदिन अन्त्येष्टि गरियो। र, हिजो मात्र उनमा कोरोना संक्रमण पुष्‍टि भएको थियो।</p>
<p>संक्रमणको पुष्टि भएपछि मलामी गएका र शव बोक्ने व्यक्तिहरू आतंकित भएको स्थानीय विजय चौधरीले बताए।</p>
<p>मलामी गएका व्यक्तिहरुले जतिसक्दो चाँडो आफूहरूको कोरोना परीक्षण गर्न आग्रह गरेका छन्।</p>
प्रतिक्रिया दिनुहोस्
.jpg)
