भारतबाट आएर क्वारेन्टाइनमा बसेका डोटीका एक युवकको मृत्यु
<p>कैलाली। पाँचदिन अघि भारतको दिल्लीबाट आएर क्वारेन्टाइनमा बसेका डोटीको केआईसिंह गाउँपालिकाका एक युवकको आज बिहान मृत्यु भएको छ।</p>
<p>गाउँपालिकाले वडा नम्बर ३ स्थित सिताराम आधारभूत विद्यालयमा बनाएको क्वारेन्टाइनमा बसेका १९ वर्षीय युवकको आज बिहान ३ बजे मृत्यु भएको हो।</p>
<p>गाउँपालिकाका स्वास्थ्य संयोजक तिलबहादुर बोहराले एक्कासी श्वासप्रश्वासमा समस्या आएपछि क्वारेन्टाइनमा नै ती युवकको मृत्यु भएको जानकारी दिए।</p>
<p>“मृत्यु के कसरी भयो अहिले नै यकिन भन्‍न सकिन्न”, उनले <em>देखापढी</em>सँग टेलिफोनमा भने, “थ्रोट स्वाबको नमूना संकलन गर्न मसहितको स्वास्थ्यकर्मीको टोली त्यसतर्फ जाँदैछौं।”</p>
<p>उनले मृतकको थ्रोट स्वाबको नमूना संकलन गरेर परीक्षणका लागि धनगढी पठाइने जानकारी दिए।</p>
<p>त्यस्तै मृतकको सम्पर्कमा आएका व्यक्तिहरुको पनि नमुना परीक्षणका लागि पठाइने छ।</p>
<p>स्वास्थ्य कार्यालय डोटीका कोभिड–१९ सम्पर्क व्यक्ति सूर्यबहादुर विष्टले मृतक युवक लामो समयदेखि मुटु रोगी रहेको बताए।</p>
<p>मृतकका बुवासमेत छोराको हेरचाहका लागि सोही क्वारेन्टाइनमा रहेका छन्।</p>
प्रतिक्रिया दिनुहोस्
.jpg)
