फोहरबाट मल बनाउँदै चितवनकाे राप्ती नगरपालिका
<p style="text-align: justify;">चितवन। पूर्वी चितवनमा रहेको राप्ती नगरपालिकामा फोहर संकलन गरेर मल उत्पादन गरिने भएको छ।</p>
<p style="text-align: justify;">मल उत्पादनका लागि आवश्यक संरचना बनिसकेको छ। लकडाउन खुलेसँगै फोहर संकलन थालिनेछ।</p>
<p style="text-align: justify;">नगरपालिका प्रमुख प्रभा बरालले राप्ती नगरपालिका-२ मा स्थानीय शिवशक्ति सामुदायिक वनसँग सहकार्य गरेर काम शुरू गरेको जानकारी दिइन्।</p>
<p style="text-align: justify;">बागमती प्रदेश र नगरपालिकाको करीब एक करोड रूपैयाँ लगानीमा जापानिज प्रविधिबाट रिकिसी नामक संस्थाको प्राविधिक सहयोगमा मल उत्पादन गर्न लागिएको हो।</p>
<p style="text-align: justify;">सो क्षेत्रमा टहरा निर्माण गरी तीनै टहराभित्र फोहरबाट मल तयार गरिएको छ। सो स्थलमा संरचना निर्माण गरी परीक्षणका रूपमा मल उत्पादन थालिएको छ।</p>
<p style="text-align: justify;">वितरणका लागि बाल्टीसमेत खरिद गरिसकिएको छ। फोहर संकलनका लागि ट्र्याक्टर खरिद गर्ने प्रक्रियामा रहेको उनले जानकारी दिइन।</p>
<p style="text-align: justify;">हरेक घरमा तीनवटा बाल्टी वितरण गरिनेछ। कुहिने, नकुहिने र बेच्न मिल्ने फोहर छुट्याएर मल उत्पादन गरिनेछ।</p>
<p style="text-align: justify;">मल नहुने फोहर बिक्री गरिनेछ। मल उत्पादनका लागि २५ जना कर्मचारीले तालिम लिइसकेको बरालको भनाइ छ।</p>
<p style="text-align: justify;">त्यहाँबाट उत्पादित प्राङ्गारिक मललाई कृषकलाई अनुदानका रूपमा वितरण गरिने उनले जानकारी दिइन्।नगरपालिकाको शहरी क्षेत्रमा धेरै फोहर जम्मा हुने गर्छ।</p>
<p style="text-align: justify;">पछिल्लो समय बनेको नगरपालिका भएकाले शुरूदेखि नै फोहर व्यवस्थित गर्नका लागि मल उत्पादन गर्न थालिएको उनले बताइन्। <em>रासस</em></p>
.jpg)
