सुत्केरीमा आरडीटी पोजिटिभ देखिपछि जिल्ला अस्पताल बैतडीका स्वास्थ्यकर्मी क्वारेन्टाइनमा
<p>काठमाडौं। जिल्ला अस्पताल बैतडीमा कार्यरत स्वास्थ्यकर्मीहरू सेल्फ क्‍वारेन्टाइनमा बसेपछि अस्पतालको नियमित सेवा प्रभावित भएको छ।</p>
<p>अस्पतालमा केही दिनअघि सुत्केरी भएकी एक महिलामा कोरोना भाइरसको आरडीटी किट परीक्षण रिपोर्ट पोजिटिभ देखिएपछि उनको उपचारमा संलग्‍न स्वास्थ्यकर्मीहरू सेल्फ क्‍वारेन्टाइनमा बसेको जिल्ला अस्पताल बैतडीका प्रमुख डा. वसन्तराज जोशीले जानकारी दिए। स्वास्थ्यकर्मीहरू नै क्‍वारेन्टाइनमा बसेपछि अस्पतालबाट प्रदान गरिने स्वास्थ्य सेवा केही प्रभावित भएको छ। </p>
<p>“१९ जना स्वास्थ्यकर्मी उहाँको उपचार गर्दा प्रत्यक्ष सम्पर्कमा हुनुहुन्थ्यो,” जोशीले भने, “सबैलाई सेल्फ क्‍वारेन्टाइनमा राख्‍ने भनेका थियौं। त्यसो गर्दा अस्पतालका अन्य बिरामीको उपचारमा समस्या हुने देखिएपछि कम सम्पर्कमा भएका चार जनाजतिले सेवा दिइरहेका छन्। बाँकी १५ जना क्‍वारेन्टाइनमा छन्।”</p>
<p>बच्चा जन्मिने समय पूरा भइसक्दा पनि सुत्केरी व्यथा नलागेपछि २० जेठमा अस्पतालमा शल्यक्रिया गरिएको डा. जोशीले बताए। त्यसपछि ती महिलामा उच्च ज्वरो देखिएको हो। “शल्यक्रिया गरेर बच्चा जन्मिसकेपछि ती महिलामा १०५.१ डिग्री ज्वरो आयो,” उनले भने, “त्यसपछि हामीले आरडीटी जाँच गर्दा पोजिटिभ देखिएको हो।”</p>
<p>महिलाको पीसीआर विधिबाट परीक्षणका लागि थ्रोट स्वाबको नमूना संकलन गरेर धनगढी पठाइएको छ। रिपोर्ट आएपछि मात्रै स्वास्थ्यकर्मी तत्काल काममा फर्किने-नफर्किने टुंगो लाग्‍नेछ। </p>
<p>नवजात शिशुको भने आरडीटी रिपोर्ट नेगेटिभ आएको छ। “पीसीआरको रिपोर्ट नआउन्जेल सुरक्षित हुनै पर्‍यो। त्यसैले क्‍वारेन्टाइनमा बस्‍न भनिएको हो,” उनले भने।</p>
<p>पीसीआर परीक्षणपछि मात्रै महिलामा कोरोना भए-नभएको प्रष्‍ट हुने छ। ती महिलालाई जिल्ला अस्पतालकै आइसोलेसनमा राखिएको छ। अहिले उनको ज्वरो नियन्त्रणमा रहेको र स्वास्थ्यमा सुधार भइरहेको अस्पतालले जनाएको छ।</p>
प्रतिक्रिया दिनुहोस्
.jpg)
