मास्क नलगाई कपाल काटेकामा जरिवाना गर्नु ‘पूर्ण मजाक’
<p>काठमाडौं। बोरुसिया डर्टमण्डका जाडोन सान्चोले घरमा मास्क नलगाई कपाल काटेको तस्वीर हेरेर जर्मन फुटबल लिगले जरिवाना गर्नु ‘पूर्ण मजाक’ भएको बताएका छन्। </p>
<p>इङ्ल्यान्डका फरवार्ड सान्चोसँगै उनका सहयात्री म्यानुयल अकान्जीलाई पनि नियम उल्लंघन गरेकामा जरिवाना गरिएको छ। </p>
<p>जर्मन फुटबल लिगले दुवै खेलाडीले ‘स्वच्छता र संक्रमण सुरक्षा’को नियम उल्लंघन गरेको जनाएको छ। सान्चोले उक्त निर्णयको ट्विटरमा विरोध गरेका थिए। उनले पछि उक्त ट्विट मेटाएका थिए। </p>
<p>डर्टमण्डले आफ्नो खेलाडीको रक्षा गरेको छ। डर्टमण्डले खेलाडीले बुन्डेसलिगाको स्वास्थ्य सुरक्षा नियम उल्लंघन नगरेको जनाएको छ। </p>
<p>जर्मनीमा गत मेदेखि हेयर सैलुन खुलेका छन्। तर, ग्राहक र हजाम दुवैले मास्क लगाउनु अनिवार्य छ। जर्मनीको एक पत्रिकाले शुक्रबार सान्चोले मास्क नलगाई कपाल काटेको तस्वीर प्रकाशित गरेको थियो। </p>
<p>बिहीबार नै डर्टमण्डका खेलकुद निर्देशक माइकल जोर्कले ६ खेलाडीको समूहमा कसैले पनि सुरक्षा निर्देशिका उल्लंघन नगरेको बताएका थिए। ती खेलाडीले तस्वीरका लागि मात्र मास्क खोलेको जोर्कले बताएका छन्। </p>
<p>तर जर्मन फुटबल लिगले सान्चो र अकान्जीलाई व्यक्तिगत सुरक्षा सामग्री प्रयोग नगरेको भन्दै कारवाही गरेको छ। </p>
<p>‘‘व्यवसायिक फुटबलरहरूले पनि कपाल काट्नुपर्छ भन्‍नेमा कुनै प्रश्‍न भएन तर उनीहरूले मेडिकल संघले जारी गरेको अवधारणालाई पालना गर्नुपर्छ,’’ जर्मन फुटबल लिगले भनेको छ।</p>
प्रतिक्रिया दिनुहोस्
.jpg)
